भांगरभूंय | प्रतिनिधी
भारताचो ग्रॅण्डमास्टर डी गुकेशाक खेळाचे मजगतीं, गरज नासतना गुंतागुंतीचो खेळ करप म्हारग पडलो. जाका लागून चीनाचो सध्याचो वस्ताद डींग लिरेना आड संवसारीक बुद्दीबळ वस्तादपण सर्तीचे पयले मॅचींत हार घेवची पडली.
संवसारीक वस्तादपण सर्तींत सगल्यांत युवा चॅलेंजर थारिल्ल्या 18 वर्सां पिरायेच्या गुकेशान सुरवातीकूच राजाच्या मुखा वयली घूल दोन घरां मुखार खेळून व्हड चूक केली. अशे तरेची चाल खेळप म्हणल्यार खेळगडो आक्रमक रितीन खेळपाक सोदता. पूण, लिरेनान ताका फ्रॅंच डिफेन्सान जाप दिली.
2001त भारताचो ग्रॅण्डमास्टर विश्वनाथन आनंदान स्पेनाच्या अॅलेक्सी शिरोवा आड अशीच रणनिती आपणायिल्ली.
12वे चाली मेरेन गुकेश लिरेना परस अर्द्या वराचो फायदो आशिल्लो. पूण, लिरेनान आठ चाली उपरांत मिनटांची भरपाय करीत गुकेशाचो खर प्रतिकार केलो. ते उपरांत उत्कृश्ट प्रदर्शन करीत 42वे चालींत जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
