भांगरभूंय | प्रतिनिधी
क्रोएशियाच्या झाग्रेब शारांत चालू आशिल्ले सुपर युनायटेड रॅपीड अॅण्ड ब्लिट्झ सर्तींत भारताचो ग्रॅण्डमास्टर डी गुकेशान वस्तादपण जोडलें.
ही सर्त ग्रॅण्ड चेस टूर 2025चो भाग आसा. गुकेशान रॅपीड फॉर्मेटांत 18तले 14 गूण मेळोवन किताब जिखलो.
अखेरचे फेरयेंत अमेरिकेचो ग्रॅण्डमास्टर वॅस्ली सो हाका 36 चालींनी हारोवन गुकेशान रॅपिडांत वस्तादपण मेळयलें. गुकेशान 9तल्यो 6 मॅची जिखल्यो. 2 बादाबाद उरल्यो जाल्याक एके मॅचींत हार घेतली.
आतां सर्तीचो ब्लिट्झ टप्पो सुरू जातलो. रॅपीड आनी ब्लिट्झ दोनूय फॉर्मेटांत मेळिल्ल्या गुणांच्या आदाराचेर निमाणो वस्ताद थारतलो.
गुकेशाची हे सर्तींतली मोहीम हारीन सुरू जाल्ली. पयले फेरयेंत ताका जॅन क्रिज्स्टोफ डुडा कडल्यान हार घेवची पडिल्ली. पूण, हे हारी उपरांत ताणें जबरदस्त पुनरागमन केलें. पयले हारी उपरांत गुकेशान सेगीत पांच मॅची जिखल्यो. चवथे फेरयेंत संवसारीक क्रमवारींत पयले सुवातेर आशिल्ल्या मॅग्नस कार्लसनाक हारयलो. हे मॅची उपरांत तो पयले सुवातेर पावलो आनी पयले सुवाते वयली पकड अखेर मेरेन कायम राखली.
सातवे आनी आठवे फेरयेंत अनीश गिरी आनी क्रोएशियाच्या इव्हान एरिक हांच्या आड बरोबरी सादल्या उपरांत, गुकेशान निमाणे फेरयेंत वॅस्ली सो आड म्हत्वाचें जैत जोडलें.
मजगतीं, भारताचो पयल्या क्रमांकाचो ग्रॅण्डमास्टर आर प्रज्ञानंदाक मात म्हणपा सारकें प्रदर्शन करपाक जमूंक ना. ताका चवथे सुवातेर समाधान मानचें पडलें. ताका एक जैत आनी एक हार घेवची पडली, जाल्यार ताच्यो सात मॅची बादाबाद उरल्यो. रॅपीड आनी ब्लिट्झ हे दोनूय प्रकार धरले जाल्यार प्रज्ञानंद अजून सर्तींत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
