डीप फेक कंटेंटाचो मनस्ताप

भांगरभूंय | प्रतिनिधी

आयच्या काळांत तंत्रगिन्यानान सामकी मळबझेप घेतल्या. मनश्याचो मेंदू जसो चलता, जे तरेन तो म्हायती एकठांय करता, सांठोवन दवरता, ताचें विश्लेशण करून ती जाय त्या वेळार उपेगांत हाडटा. तशेच तरेचें काम संगणका कडल्यान कशें करून घेवंचें हाचेर 50- 60 च्या दशकांतल्यानच संवसारभर संशोधन सुरू जाल्लें. जॉन मॅकार्थी ह्या संगणक वैज्ञानिकान तर 1956 क ह्या तरेचे प्रक्रियेक “आर्टिफिशियल इंटेलिजंस” हें उतरय दिल्लें. वैज्ञानिकांच्या ह्या अथक यत्नांक ल्हव ल्हव प्रमाणांत येस मेळपाक लागलें. वेगवेगळे आवाज वळखुवप, मनशाची उतरांची भाशा समजुवप अशे कांय तरेचे प्रयत्न येसस्वी जावंक लागिल्ले. आनी शेवटाक 2022 वर्साक ओपन एआय हांणी चॅटजीपीटी हें परिपुर्ण अशें एआय टूल तयार करून सामान्य मनशा मेरेन एआयची ताकद पावयली. ताचे फाटोफाट गुगल जेमिनी, क्लावड 3.5, मायक्रोसॉफ्ट को-पायलट, मेटा एआय आनी निमाणे कडेन चीनाचें डीप सीक सारकेल्या एआय टुलांचो पावस पडलो.
कसलेंय नवें संशोधन करतना वैज्ञानीक ते लोकांच्या बऱ्या खातीर वा फायद्या खातीरच करपाचो हेत दवरून करतात. पूण एक फावट ते लोकां मेरेन पावले काय मागीर ताचो वापर बऱ्या खातीर काय वायटा खातीर करप हें तें वापरतल्याच्या प्रवृत्तीचेर निंबून आसता. अशें सद्य स्थितींत ए आय चे बाबतींत घडटा.
इंटरटनेट आनी खास करून सोशल मिडिया खातीर सर्वसामान्यांक मेरेन संवसारभरची म्हायती कांय सेकंडा भितर पावता. आनी आपल्या कडेन पाविल्ली म्हायती खरी काय फट हाची शहानिशा करिनासतना जायते जाण ती फुडें धुकलतात म्हणल्यार बाकीच्यांक शेअर करतात. जायती म्हायती फटूय आसता आनी ती कशे तरेन लोकांमदीं घोळटा आनी तथ्यांचो गोंदळ आनी लोकांमदीं गैरसमज पातळावपाक कारणीभूत थारता हें आमीं फाटल्या लेखांत पळयलांच. तातूंत भरीक भर म्हूण आतां लोकांक एआय सारकेलें साधन मेळिल्ल्यान इंटरनेट वेबसायट वा सोशल मिडियाचेर मेळिल्ली म्हायती कितली अस्सल वा सत हाचेबद्दल लोकांचो सामकोच गोंदळ जाला. खरें आनी फट हाचे मदली शिमरेखा आतां ए आय खातीर पुसून वचपाच्या वाटेर पावल्या.
ए आय वापरून केल्ल्या व्हीडीओ आमी शिक्षणीक क्षेत्रांत विद्यार्थ्यांक कसलीय संकल्पना समजावपाक, चित्रपट तशेंच मनोरंजन क्षेत्रांत स्पेशल इफेक्ट घालपाक, आवाज डबींग करपाक, डिजिटल खबरां चॅनलाचेर कसलीय खबर रिक्रिएट
करूंक वापरूंक शकतात. आकिटेक्ट, इंजिनियर, मिलिटरी अश्याय क्षेत्रांनी एआय चो वापर व्हड प्रमाणांत जाता. आनीकुय जायते फायदे आमकां ए आय खातीर जाल्यात.
पूण सोशल मिडियाचेर ए आय चो वापर सद्या सगळ्यांत चड जाता तो नकली फोटो, ध्वनी मुद्रण आनी व्हीडीओ शेअर करपाक जे सामके खरे कशें दिसतात. डीप लर्नींग तंत्रगिन्यानाचो वापर करून संगणकाक मनश्याचे तोंडावेले हावभाव, आवाज आनी कुडीच्यो हालचाली हाताळपाक शिकयतात. आनी सगळी म्हायती एकफावट संगणक शिकलो की तो जे सामके हुबेहूब दिसपी पूण नकली फोटो, आवाज वा व्हीडीओ तयार करून दिता ताका डीप फेक अशें म्हणटात.
अशे तंत्रगिन्यानाचो वापर करून केल्ले नकली व्हीडीओ लोकां मदीं फटीची म्हायती आनी खबर पावयतात. राजकारणी, सेलेब्रिटी वा मिलिटरी ऑफीसर वा वयले हुद्द्यावेले सरकारी अधिकारी हांचे व्हीडीओ वापरून तातूंत ॲडिट करून म्हणल्यारच जाय तो बदल करून ते उलयता ते वेगळेच कितें तरी करून, सोशल मिडियाचेर तो प्रसारीत करून जायते जाण भौसाची दिशाभूल करतात. सायबर गुन्यांव करपाक लेगीत आतां ए आय चो वापर सर्रास जावपाक लागला. स्कॅमर्स तर आपलो आवाज बदलून पिडिताच्या घरांतल्या वांगड्याच्या वा इश्टाच्या आवाजाची नक्कल करून मोबायलाचेर फोन करतात आनी आपूण अडचणींत आसा सांगून पयशे लुटतात. एकल्याच्या कुडीचेर दुसऱ्याचें मुखामळ लावन अश्लील फोटो वा व्हीडीओ करून ब्लॅकमेल करपा सारकेय प्रकार वाडीक लागल्यात. जायतीं जाणां ह्या प्रकाराक बळी पडल्यांत. मुखामळ स्कॅन करून मोबायल एक्सेस करप वा खंयच्याच अतिसंवेदनशील म्हायती आशिल्ल्या जाग्यार प्रवेश मेळोवपा खातीर फेशियल रिकॉग्निशन सेक्यरिटी सिस्टमाचो वापर जाता. डीप फेक वापर करून आतां फ्रॉडस्टर्सानीं ती सॅक्युरिटी सिस्टम तोडपाक येस मेळयलां. ऑनलाइन इंटरव्यूव दितना लेगीत कांय जाण ए आयचो वापर करून नोकरेर नियुक्त करपी आस्थापनांक फटयतात.
एआय डिप फेक तंत्रगिन्यान वापरून भारतभर फाटल्या 2-3 वर्सांत जायत्यो घडणुको घडल्यात. तातूंतल्योच कांय पळोवया.
नोव्हेंबर 2023वर्सा अभिनेती रश्मिका मंदाना हांचो एक डीप फेक विडिओ सोशल मिडियाचेर व्हायरल जाल्लो. पुलीस चवकशी जातकच समजलें तो विडिओ आंध्र प्रदेशच्या ईमानी नवीन ह्या 24 वर्साच्या इंजिनियरान केल्लो. आपल्या इन्स्टाग्रामाचेर फोलोवर वाडोवपा खातीर ताणें झारा पटेल ह्या ब्रिटिश भारतीय इन्फ्लुएन्सराक वापरून ताच्या कुडीचेर अभिनेती रश्मिका मंदानाचें मुंडके लावन हुबेहुब रश्मिका सारके दिसपी चलयेचो फेक विडिओ केलो. गरजे भायर रश्मिकाचें नांव पिड्ड्यार जालें आनी ताका मनस्ताप सोंसचो पडलो.
2024 वर्सा बंगळुरूक कांय फ्रॉडस्टरांनी नारायण मुर्ती, मुकेश अंबानी सारकेल्या व्हड वेवसायिकांचो डीप फेक वापरून व्हीडीओ तयार केले आनी त्या व्हीडीओंतल्यान लोकांक शेअर मार्केटांत गुंतवणूक करपाक आवाहन करून नकली ट्रेडींग प्लॅटफ़ॉर्मा वरवी लागींलागीं 95 लाखांक गंडो घालो.
2024 वर्सा जाल्ल्या लोकसभेच्या मतदाना वेळार तामीळनाडूंत डीप फेक वापरून संवसाराक अंतरिल्ल्या सर्गेस्त मुथूवेल करुणानिधी आनी जयललीता सारक्या राजकारण्यांचो डीप फेक व्हीडीओ मतदारांमदी शेअर करून भावनीक रित्या मतदारांक प्रभावीत करून तांचीं मतां मेळोवपाचो प्रकार कांय राजकीय पंगडांनी केलो. केरळांतल्या पी. एस. राधाकृष्णन नांवाच्या 73 वर्सां पिरायेच्या एका निवृत्त सरकारी कर्मचाऱ्याक डीप फेक ओडिओ वापरून पयशे धाडपाक सांगलें. आवाज बदलून हुबेहुब ताच्या विश्वासू मनशाच्या आवाजान ताका फोन करून पयशे मागले आनी ताका फटयलो.
संवसारीक पांवड्यार लेगीत जायते डीप फेक जातात, तातूंतलेच एक म्हणल्यार अमेरिकेचो नामनेचो उद्देजक एलोन मस्क हांचो वापर करून लोकांक क्रिप्टो करंसींत गुंतवणुक करपाक सांगपी डीप फेक करून स्कॅमर्सांनी जायते जाणांक नागयले. तेच प्रमाण
भारताच्यो अर्थमंत्री निर्मला सितारामणचो वापर करून तसलेंच प्रकारचें स्कॅम
करपी व्हीडीओ सोशल मिडियाचेर
नदरेक जायते फावट आयले.
अशे व्हीडीओ रोखडेच रिपोर्ट करूंक जाय.
ह्यो कांय बोटाचेर मेजपाच्यो देखी. पूण एआयचो वापर करून हालींच्या वर्सांनी सर्वसामान्या लोकां मदीं इतलीं स्कॅमां जाल्यांत की ताचें लुकसाण भारतातंच कोट्यांनी रुपयांचेर पावलां हाचे वेल्यान संवसारभरचे सामान्य लोकांक कितले व्हड लुकसाण सोंसचें पडलां आसतलें हाचो अदमास केल्लो बरो.
जशेजशे एआय तंत्रगिन्यान विकसीत जायत आसा तशेंतशें डीप फेक कंटेंट वळखुवप सामकेच कुस्तार जायत चल्लां. पूण मातशे बारीकसाणेन व्हीडीओ जर पळयलो जाल्यार कांय क्लू आमकां मेळूंक शकतात. उलयतना ओंठाची हालचाल आनी उतरां हांचो ताळमेळ, व्हीडीओचे फांटभुंयेचेर आशिल्ले रंग आनी उजवाड हांची तफावत, चलतना हातां- पांयांची, कुडीची अकृत्रीम हालचाल हाचेर नदर दिवन बारीकसाणेन लक्ष दिलें जाल्यार आमकां कांय प्रमाणांत डीप फेक वळखूंक येता. आतां जायतीं सॉफ्टवेअर आयल्यांत जे वरवी सायबर सेक्युरिटी अधिकारी डीप फेक कंटेट सहजपणान वळखूंक शकतात.
सध्याक डीप फेक कंटेटा खातीर सायबर मळार सावळो गोंदळ चल्ला. आपल्या फायद्या खातीर फटीची म्हायती इंटरनेटावरवी पसरावप्यांक आनी स्कॅमा करतल्यांक तर ए.आय. टूल म्हणल्यार माकडा हातांत कोलीत मेळिल्ल्यावरी जालां. हे फुडें खंय मेरेन पावत हाचो अंदाज लावप खुबूच कुस्तार. तेन्ना इंटरनेट, सोशल मिडियाचो वापर करपी सर्वसामान्य मनश्यान सांबाळून करप आनी दरेक पावलाक जागरूक आनी शिटूक रावप हेंच योग्य.

मंजुषा सिनाय तळावलीकार