डीपीआर सादर केल्ल्यान केंद्रीय उदका आयोगाचो पंगड गोंयांत

भांगरभूंय | प्रतिनिधी

प्रमोद बदामीः 300 रुपया मोडून अंजूणे धरणाची जातली दुरुस्ती

भांगरभूंय । प्रतिनिधी

पणजीः अंजूणे धरणाक 50 वर्सां जाल्यात. धरण तशेंच कानालांची दुरुस्ती करप गरजेचें आसा. तशेंच अंजूणे धरणाच्या उदकाचेर निंबून आशिल्ल्या लोकांक गरजेचें आशिल्लें उदक दिवचे खातीर कानालांची दुरुस्ती लेगीत करप गरजेचें आसा. ते खातीरचो डीपीआर तयार करून आपणे तो आदींच केंद्रीय उदका आयोगाक धाडला. तशेंच ह्या कामां खातीर 300 कोटींचो निधी लेगीत मागला. तेच नदरेन धरणाची पळोवणी करपा खातीर केंद्रीय उदका आयोगाचो पंगड गोंयांत आयिल्लो. ह्या पंगडा वांगडा आपूण लेगीत आशिल्लो, अशें उदका स्रोत खात्याचे मुख्य अभियंते बदामी हांणी सांगलें.

सुमार 300 कोटी रुपया खर्च करून अंजूणे धरणाची दुरुस्ती करपाचो विचार गोंय सरकारान चलयला. ते संबंदांतलो सविस्तर प्रकल्प अहवाल (डीपीआर) केंद्र सरकाराक सादर केला. तेच खातीर केंद्रीय उदका आयोगाच्या पंगडान अंजूणें धरणाची पळोवणी केली, अशें बदामी हांणी शेनवारा ‘भागरभूंय’ कडेन उलयतना दिली.

कळसा- भांडुरा संबंदांतल्या कर्नाटकाच्या डीपीआराक कांय म्हयन्यां आदीं केंद्रीय उदका आयोगान मान्यताय दिली. ते खातीर गोंयांतलें राजकारण तापिल्लें. ताचो धग गोंयांत अजून कायम आसा. अश्या वेळार आयोगाच्या पंगडान विर्डी आनी अंजूणे ह्या दोन धरणांची पळोवणी केली. आयोगान हे पळोवणेची पूर्वकल्पना गोंयांतल्या म्हादय विभागाक दिवंक नाशिल्ल्याचें मुखार आयिल्ल्यान उदका स्रोत खात्याच्या अधिकाऱ्यां मदीं दुगदूग वाडिल्ली. पूण म्हादय विशय आनी अंजूणे धरणाचे पळोवणेचो कसलोच संबंद ना, अशें बदामी हांणी सांगलें.

देशभरांतल्या धरणांचीं कामां, दुरुस्तीची प्रशासकीय प्रक्रिया केंद्रीय उदका आयोगा कडल्यान जाता. ते खातीर तांकां पळोवणी करप गरजेचें आसता, अशेंय बदामी हांणी स्पश्ट केलें.

‘भांडुरा कानालाचें काम सुरू करपाक शकनात’

कर्नाटका कडल्यान भांडुरा कानालाचें काम फुडें व्हरपाचे यत्न चल्ल्यात, हे चर्चेंत मातूय तथ्य ना. म्हादयचो खटलो सध्या सर्वोच्च न्यायालयांत चालू आसा. न्यायालयान ह्या कामाचेर स्थगिती हाडल्या. दुसरे वटेन प्रवाह समितीन पळोवणी केल्या. अशे स्थितींत कर्नाटक भांडुरा कानालाचें काम सुरूच करपाक शकना, अशें प्रमोद बदामी हांणी सांगलें.