भांगरभूंय | प्रतिनिधी
युरी आलेमांवः माशेलांत ‘आमची म्हादय आमकां जाय’ची जाहीर सभा
भांगरभूंय । प्रतिनिधी
फोंडें: गृहमंत्री अमीत शाह हांची भेट घेवपा खातीर दिल्ली गेल्ल्या गोंयच्या शिश्टमंडळान कर्नाटक सरकाराक दिल्लो डीपीआर फाटीं घेवचे खातीर चेपण हाडपाक जाय. म्हादय प्रस्नाचेर फुडल्या 7 दिसां भितर डीपीआर केंद्र सरकारान फाटीं घेतलो ना जाल्यार मुख्यमंत्री डॉ. प्रमोद सावंत हांणी पदाचो राजिनामो दिवचो, असो उलो विरोधी पक्ष फुडारी युरी आलेमांव हांणी मारला.
माशेलांत आमची म्हादय आमकां जाय वतीन आयोजीत केल्ले जाहीर सभेंत आलेमांव उलयताले. ह्या वेळार पर्यावरण तज्ञ राजेंद्र केरकार, काँग्रेसीचे आमदार कार्लोस फरेरा, प्रतिमा कुतिन्हो, पर्यावरण मोगी रमेश गांवस, समील वळवयकार, डॉ. दत्ताराम देसाय, कांता गावडे, प्रकाश नायक, पत्रकार राजू नायक, राजेंद्र काकोडकार, ह्रदयनाथ शिरोडकार, तारा केरकार, नोनू नायक, रामकृष्ण जल्मी, राजदीप नायक, अविता बांदोडकार, दिलीप बोरकार, मधू गांवकार आनी हेर मानेस्त हाजीर आशिल्ले.
म्हादय प्रस्नाचेर केंद्रा कडेन बाजू मांडपाक 1980 उपरांत सत्तेर आयिल्लें दरेक गोंय सरकार अपेशी थारलां. राज्यांतलें सरकार केंद्र सरकारान जारी केल्ल्या आदेशाक पाळो दिवन गुलाम जालां. ताकाच लागून म्हादय न्हंयेच्या प्रस्ना संबंदांत एक दिसाचें अधिवेशन घेवपाक लेगीत सरकार तयार ना. म्हादय प्रस्नाचेर खोलायेन चर्चा जावपाची खूब गरज आसा. गोंयच्या लोकांनी जागे जावन, संघटीत जावन लढो दिल्यार म्हादय संबंदांतलो लढो लोक निश्चीत जिखतले, अशें आलेमांव हांणी सांगलें.
म्हादय प्रस्ना वयल्यान केंद्र आनी राज्यां मदीं वाद निर्माण जाला. गोंयची बाजू घटमूट करचे खातीर कर्नाटकान केल्ल्यो चुकी सर्वोच्च न्यायालया मुखार मांडपाची गरज आसा. सरकारान हे आदींय म्हादय अभयारण्य हे वाघ्र वाठार म्हूण राखीव करपाची गरज आशिल्ली. पूण म्हादय संबंदांत गोंयांतल्या राजकी फुडाऱ्यांनी अभ्यास करिनासतना उलोवपाचेर अदीक म्हत्व दिल्ल्याचें दिसता. ताकाच लागून उदकाचो एक थेंबो लेगीत कर्नाटकाक दिवचे नात, अशें राजकारणी उलयतात. हलतरा, कळसा, भंडुरा आनी सुर्ला हे न्हंयेचें उदक घुंवडावपाक कर्नाटक सरकाराक येस आयलां. ते खातीर दोन दिसांचें अधिवेशन घेवन ताचेर अभ्यास करून चर्चे वरवीं निर्णय घेवपाची गरज आसा, अशें राजेंद्र केरकार हांणी सांगलें.
ह्या वेळार रमेश गांवस, राजू नायक, राजेंद्र काकोडकार दिलीप बोरकार, प्रतिमा कुतिन्हो, आमदार कार्लेस फरेरा हांणी आपले विचार मांडले. कांता गावडे हांणी प्रास्तावीक केलें, प्रकाश नायक हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
