भांगरभूंय | प्रतिनिधी
पणजी : दयानंद सामाजीक सुरक्षा येवजणेच्या लाबार्थ्यांचो (डीडीएसएसवाय) आंकडो हे फुडें 1 लाख 40 हजार लोकां मेरेनूच मर्यादीत उरतलो. 1 लाख 40 हजार लोकां वयर येवजणेचो लाव मेळचो ना. अर्जांचो आंकडो वाडलो जाल्यार प्रतिक्षा वळेरी (वेटींग लिस्ट) तयार करतले. पयलो अर्ज करप्याक पयली लाव, ह्या तत्वाचेर येवजणेचो लाव मेळटलो. लाबार्थ्यांचो आंकडो मर्यादीत दवरपी अधिसुचोवणी जारी जाल्या.
तशेंच लाबार्थ्यां खातीर पयली येणावळीची मर्यादा 24 हजार रुपया आसली. ही मर्यादा आतां 1 लाख 50 हजार रुपया जाल्या. कुटुंबाची येणावळ देड लाखा मेरेन आशिल्ल्यांक आतां दयानंद सामाजीक सुरक्षा येवजणेचो लाव मेळटलो.
दयानंद सामाजीक सुरक्षा येवजणे खातीर पयली कुटुंबाचे येणावळीची मर्यादा 24 हजार रुपया आशिल्ली. ती वाडोवन आतां देड लाख केल्या. हाका लागून लाबार्थ्यांचो आंकडो वाडपाची शक्यताय आसा. आयचे घडयेक 1 लाख 38 हजार लोकांक दयानंद सामाजीक सुरक्षा येवजणेचो लाव मेळटा. हो आंकडो केन्नाच 1 लाख 40 हजारां फुडें वचूंक ना. येणावळीची मर्यादा वाडयल्ल्यान आंकडो 1 लाख 40 हजारांचे फुडें वचपाची शक्यताय न्हयकारपाक जाय ना. हाका लागून लाबार्थ्यांचो आंकडो 1 लाख 40 हजार लोकां मेरेन मर्यादीत दवरपाचो निर्णय घेतला, अशी म्हायती समाज कल्याण खात्यातल्या गोपांनी दिली.
जितले अर्ज येतात, तितले अर्ज घेवन दवरतले. आंकडो 1 लाख 40 हजारांचे फुडें गेलो जाल्यार वेटींग लिस्ट तयार करतले. एकाद्या दुसऱ्या लाबार्थ्याक मरण आयलें वा तो बोगस आशिल्ल्याचें सिद्द जालें जाल्यार वेटींग लिस्टांतल्या अर्जांक येवजणेचो लाव मेळटलो. हे येवजणे खाला दिव्यांग (डिजेबल्ड) लोकांक म्हयन्याक 2000 ते 3500 रुपयां मेरेन लाव मेळटलो. डिजेबिलीटी प्रमाण येवजणेचे पयशे मेळटात. दिव्यांग कायदो 2016 च्या कलम 2 प्रमाण दिव्यांगाक येवजणेचे पयशें मेळटले. ज्येश्ठ नागरिकांक म्हयन्याक 2 हजार रुपया मेळटात. जांचे आवय बापूय ना, त्या अनाथ भुरग्यांक येवजणे खाला 2 हजार रुपया दिवपाची तजवीज आसा. ज्या विधवा बायलांक भुरगीं ना, तांकां म्हयन्याक 2500 रुपया दिवपाची तजवीज आसा. 21 वर्सां सकयलो भुरगो आसलो जाल्यार विधवा बायलांक म्हयन्याक 4000 रुपया दिवपाची तजवीज आसा. 21 वर्सां सकयले पिरायेचो भुरगो आसल्यार विधवा बायलांक 4000 रुपया दिवपाची तजवीज हे अधिसुचोवणेंत केल्या. ज्या विधवा बायलांक दयानंद सामाजीक सुरक्षा येवजणेचो लाव मेळटा तांकां गृहआधार येवजणेचा लाव मेळचो ना, हे लेगीत अधिसुचोवणेंत स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
