भांगरभूंय | प्रतिनिधी
-भाजपाध्यक्ष नड्डा हांकां भाजप मुख्यालयाच्या पायाभरणीचे निमंत्रण
तांकतिकेन दिल्लींत गेल्ल्या मुख्यमंत्री डॉ. प्रमोद सावंत हांणी राज्यसभा खासदार तशेंच भाजप प्रदेशाध्यक्ष सदानंद शेट तानावडे हांचे सयत भाजपाध्यक्ष जे. पी. नड्डा हांची भेट घेतली. हे भेटींत प्रदेश भाजपाच्या नव्या मुख्यालयाच्या इमारतीच्या बुन्यादी फातर बसोवपाच्या कार्यावळीक नड्डा हांकां निमंत्रण दिलां. पूण राज्य मंत्रीमंडळांतल्या फेरबदला संदर्भांत हे भेटींत चर्चा जाल्ल्याची शक्यताय आसा. मुख्यमंत्री डॉ. सावंत आनी प्रदेशाध्यक्ष तानावडे बुधवारा केंद्रीय गृहमंत्री अमीत शाह हांची भेट घेतले.
लोकसभा वेंचणुके उपरांत मंत्रीमंडळांत फेरबदल जावपाची शक्यताय आशिल्ल्याचे संकेत मुख्यमंत्री डॉ. सावंत हांणी दिल्ले. ते उपरांत मंगळारा तांणी अचकींत दिल्लींत वचून प्रदेशाध्यक्ष तानावडे हांचे सयत भाजपाध्यक्ष नड्डा हांची भेट घेतिल्ल्यान मंत्रीमंडळांतल्या फेरबदला संदर्भांत चर्चांक ओतो आयला.
हे संदर्भांत तानावडे हांचे कडेन संपर्क केल्यार, प्रदेश भाजपाचे मुख्यालय चिंबला उबारपाचो निर्णय पक्षान घेतला. मुख्यालयाच्या इमारतीचें काम फुडल्या कांय दिसांत सुरू करतले. ह्या इमारतीच्या बुन्यादी फातर बसोवपाचे कार्यावळीक हजर रावपाचे निमंत्रण आमी नड्डा हांकां दिलां, अशें तांणी म्हणले. नड्डा वांगडा बसकेंत लोकसभा वेंचणुकांतल्या निकाला विशींय चर्चा जाली.
आयज शाह हांचे भेटींत येतलो डीजीपींचो विशय
मुख्यमंत्री डॉ. प्रमोद सावंत आनी प्रदेशाध्यक्ष सदानंद शेट तानावडे बुधवारा केंद्रीय गृहमंत्री अमीत शाह हांची भेट घेतले. हे भेटींत आसगांव प्रकरणांत आरोपी पांदल्यांत उबे आशिल्ले पुलीस म्हासंचालक (डीजीपी) जसपाल सिंग हांचे विशीं चर्चा जावपाची आसून, जसपाल सिंग हांचेर बेगोबेग कारवाय करपाची मागणी मुख्यमंत्री डॉ. प्रमोद सावंत करतले, अशी म्हायती सुत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
