भांगरभूंय | प्रतिनिधी
जसपाल सिंग हांचे संबंदांतलो अहवाल आपलोच आशिल्ल्याची प्रशल हांची कबुली
भांगरभूंय । प्रतिनिधी
म्हापशें: आसगांवचे प्रदीप आगरवाडेकार हांचें घर मोडप आनी बापूय- पुताच्या अपहरण प्रकरणांत दुबाव आनी टिकेचे धनी जाल्ले पुलीस म्हासंचालक (डीजीपी) डॉ. जसपाल सिंग हांची बदली जावपी शक्यताय आसा. सोमार मेरेन दिल्लींतल्यान तांचे बदलीचो आदेश येवपाक शकता. म्हासंचालक जसपाल सिंग हांचे संबंदांत सय नाशिल्लो आनी व्हायरल सत्यस्थिती अहवाल आपलोच आशिल्ल्याची कबुली निलंबीत पुलीस निरिक्षक प्रशल नायक देसाय हांणी विशेश चवकशी पंगडा मुखार (एसआयटी) दिल्या. जाल्यार ह्या प्रकरणांतली दुबावीत पुजा शर्मान आपूण चवकशे खातीर 1 जुलयाक हाजीर रावपाक शकना अशें कारण दिवन, दुसरी तारीख दिवपाची विनवणी एसआयटी कडेन केल्या.
भायरो आल्तो- आसगांवचे आगरवाडेकार हांचें घर मोडपाच्या प्रकरणांत पुलीस म्हासंचालक जसपास सिंग हांचेर बोट दवरिल्लो हणजूणें पुलीस स्टेशनाचो निलंबीत निरिक्षक प्रशल नायक देसाय हांचो अहवाल शुक्रारा सोशल मिडियाचेर व्हायरल जाला. आगरवाडेकार हांचें घर मोडपा खातीर म्हासंचालक जसपाल सिंग हांणीच हणजूणें पुलिशेचेर चेपण हाडलें. तशेंच धमकी लेगीत दिल्ली. असो अहवाल गोंयचे मुख्य सचीव पुनीतकुमार गोयल हांकां सादर जाल्लो. संबंदीत अहवालाचेर सय नाशिल्ल्यान साबार तर्क- वितर्क चलताले. ताका लागून गोंयांत खवदळ पडिल्लो आसतनाच, शुक्रारा एसआयटीन निलंबीत पुलीस निरिक्षक देसाय हाची अहवाला विशीं चवकशे केली तेन्ना हो अहवाल आपलोच आशिल्ल्याचें ताणें स्पश्ट केलें. ताका लागून म्हासंचालक जसपाल सिंग ह्या प्रकरणांत आनीक घुस्पला. सोमार मेरेन तांची बदली जावपाची शक्यताय आसा. गोंय सरकारा वतीन ते खातीर यत्न चालू आशिल्ल्याची म्हायती सुत्रांनी दिली.
आसगांव प्रकरणांत आपणे कोणाचेरूच चेपण हाडूंक नाशिल्लें. तशेंच ह्या प्रकरणांत आपलो कसलोच संबंद नाशिल्ल्याचें म्हासंचालक जसपाल सिंग हांणी म्हणिल्लें. पूण प्रशल नायक देसाय हांचे कबुलीक लागून ह्या प्रकरणा फाटल्यान जसपाल सिंगूच आशिल्ल्याचें मुखार आयलां.
मजगतीं, ह्या प्रकरणांतली मुख्य दुबावीत पुजा शर्मा (मुंबय) हिका एसआयटीन समन्स धाडून 1 जुलयाक चवकशे खातीर हाजीर रावपाक सांगिल्लें, पूण पुजा शर्मा हिणें त्या दिसा आपूण हाजीर रावपाक शकना, ताका लागून हाजीर रावपाची दुसरी तारीख दिवची, अशी विनवणी एसआयटीक केल्ल्याचें सुत्रांनी सांगलें.
हणजूणेंचो ताबो परेश नायक हांचे कडेन
आसगांव प्रकरणांत लागणूक पाळूंक नाशिल्ल्याचो ठपको दवरून हणजूणें पुलीस निरिक्षक प्रशल नायक देसाय हाचे सयत दोग उपनिरिक्षकांक निलंबीत केल्ले. ताका लागून हणजूणें पुलीस स्टेशनाचो ताबो कळंगूटेचे पुलीस निरिक्षक परेश नायक हांचे कडेन दिला.
ख्वाजा अटकपूर्व जामिना खातीर न्यायालयांत
आसगांव प्रकरणांत अटक केल्लो रिअर इस्टेट एजंट अर्शद ख्वाजा (51. रा. दोनापावला) हाका म्हापशें न्यायालयान दोन दिसांची अतिरिक्त पुलीस कोठडी फर्मायल्या. अटकपूर्व जामिना खातीर ताणें न्यायालयांत अर्ज दाखल केला. ताच्या अर्जा वयली सुनावणी 2 जुलयाक पणजी जिल्हो न्यायालयांत जातली. जाल्यार दुबावीत अश्पाक शेख, बिस्मिल्ला गोरगुंदागी, शालन कल्लपा मोरेकर, शाहीन जाफर सौदागर हांकां 14 दीस न्यायालयीन कोठडेंत दवरपाचो आदेश न्यायालयान दिला.
ओमवीर सिंगाक रुजू जावपाचो आदेश
म्हासंचालक जसपाल सिंग हाची तत्काळ बदलीची शक्यताय आसातनाच राज्य सरकारान सुटयेर आशिल्ले म्हानिरिक्षक ओमवीर सिंग हांकां परतून ड्युटीचेर रुजू जावपाचे आदेश दिल्यात. ओमवीर सिंग सध्या सुटये निमतान सॅन फ्रान्सिस्को आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
