भांगरभूंय | प्रतिनिधी
आयज गृह मंत्रालया कडल्यान बदलेचो आदेश येवपाची शक्यताय
पणजी: आसगांव प्रकरणांत आडकल्ले पुलीस म्हासंचालक (डीजीपी) डॉ. जसपाल सिंग हांचेर राज्य सरकार कशे पद्दतीन कारवाय करतलें हाचे कडेन पुराय राज्याची नदर लागून आसा. मुख्यमंत्री डॉ. प्रमोद सावंत हांणी हें प्रकरण गंभीरतायेन घेतिल्ल्यान सोमारा सिंग हांचे बदलीचो आदेश दिल्लींतल्यान येवपाची शक्यताय आसा.
आसगांवां प्रदीप आगरवाडेकार हांचे रावतें घर बेकायदो रितीन मोडप आनी आगरवाडेकार बापूय-पुताचें अपहरण करपाच्या प्रकरणान दोन-तीन दिसांत खूबशीं मोडणां घेतलीं. तातूंतच हणजूणचे निलंबीत पुलीस निरिक्षक प्रशल नायक देसाय हांणी मुख्य सचीव पुनीतकुमार गोयल हांकां सत्यस्थितीचो अहवाल सादर करून म्हासंचालक जसपाल सिंग हांकां आरोपीच्या पांदऱ्यांत उबो केलो.
आगरवाडेकार हांचे घर मोडपाचे निर्देश जसपाल सिंग हांणीच दिल्ले. तशें केलें ना जाल्यार वा घर मोडपाचें काम थांबयल्यार कारवाय करपाचे आनी ड्रग्स प्रकरणांत गुथोवपाची धमकीय आपल्याक दिल्ली अशें नायक देसाय हांणी मुखेल सचिवांक सादर केल्ले सत्यस्थिती अहवालांत नमूद केल्लें. हाचे वेल्यान राज्यांत खवदळ पडिल्लो आसतना गुन्यांव फांट्याचे अधिक्षक राहूल गुप्तहा हांणी पत्रकार परिशद घेवन संबंदीत अहवालाचेर कोणाचीच सय नाशिल्ल्याचें स्पश्ट केलें. तशेंच अहवालाचे सत्यताये विशींय उलोवप केलें. उपरांत प्रशल नायक देसाय हांणी ह्या प्रकरणांत स्थापन केल्ल्या विशेश चवकशी पंगडा मुखार (एसआयटी) म्हासंचालक जसपाल सिंग हांचे विशीं सय नाशिल्लें आनी व्हायरल सत्यास्थिती अहवाल आपलोच आशिल्ल्याची कबुली दिल्ल्यान सिंग हांचे पांय आनीक खोलांत गेल्यांत. आसगांव प्रकरणांत आपणे कोणाचेरूच चेपण घालूंक नाशिल्लें. तशेंच ह्या प्रकरणांत आपलो कसलोच संबंद नाशिल्ल्याचें म्हासंचालक जसपाल सिंग हांणी म्हणिल्लें. पूण प्रशल नायक देसाय हांचे कबुलीक लागून ह्या प्रकरणा फाटल्यान जसपाल सिंग आशिल्ल्याचें मुखार आयलां.
मजगतीं, ह्या प्रकरणांतले आठ पैकीं सात दुबावीत सद्या कोठयेंत आसात. जाल्यार एकल्याची जामिनार सुटका केल्या.
नेमकी कसली जातली कारवाय?
– आसगांव प्रकरण बेकायदो आसा. गोंया भायल्या नागरिकांनी गोंयांत येवन गोंयकारांचेर दादागिरी करूंक दिवचो ना अशी शिटकावणी मुख्यमंत्री डॉ. प्रमोद सावंत हांणी पयलींच दिल्या. आसगांव प्रकरणांतल्या एकल्याय दोशीक सोडचो ना. ह्या प्रकरणांत जे पुलीस दोशी दिसून येतले तांकां निलंबीत करतले अशी गवाय लेगीत तांणी दिल्या.
– बेकायदो प्रकरणांत दोशी दिसून आयल्यार एयएएस, आयपीएक अधिकाऱ्यांचेर कारवाय करपाचे विशेश अधिकार राज्य सरकाराक आसतात. ताका लागून म्हासंचालक जसपाल सिंग हांचेर नेमकी कसली कारवाय जातली हाचे कडेन गोंयकारांचें लक्ष लागून आसा.
बदले खातीर सरकाराचे यत्न
म्हासंचालक जसपाल सिंग हांचे बदले खातीर गोंय सरकारान यत्न सुरू केल्यात. ताका लागून तांचेर निश्चीत कारवाय जातली आनी सोमार मेरेन सिंग हांचे बदलेचो आदेश गृह मंत्रालया कडल्यान येवंक शकता अशी म्हायती सरकारी गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
