भांगरभूंय | प्रतिनिधी
मरण आयिल्ल्यांचो लाव जातलो बंद, नाम्याचेर रावानाशिल्ल्यांचो स्थगीत
भांगरभूंय । प्रतिनिधी
पणजीः समाज कल्याण खात्याच्या दयानंद समाजीक सुरक्षा येवजणचो (डीएसएसवाय) लाव भायर पडिल्ल्यांचें घरचे घेतात अशें मुखार आयलां. ताका लगून 80 वर्सां पिराये वयल्या लोकांचो सर्वे सुरू केला. ह्या सर्वे वेळार फाटल्या 20 दिसांनी 500 परस अदीक भायर पडिल्ल्या मनशाच्या नांवाचेर येवजणेचो लाव जमा जाल्ल्याचें उजवाडाक आयलां. हे मुखार मरण आयिल्ल्या लाबार्थींचो लाव बंद करतले. तशेंच येवजणेचो लाव घेवन लेगीत दिल्ल्या नाम्याचेर लाबार्थी रावना जाल्यार ताचो नामो निश्चीत जाय नेरेन ताचे खातीर येवजण स्थगीत दवरतले. खात्याचे संचालक अजीत पंचवाडकार हांणी शुक्रारा ‘भांगरभूंय’ कडेन उलयतना हे विशीं म्हायती दिली.
गोंयांतल्या ज्येश्ठ नागरिकांक अर्थीक मजत करचे खातीर 2001 त तेन्नाच्या राज्य सरकारान ‘डीएसएसवाय’ येवजण सुरू केल्ली. येवजणे खाला सध्या गोंयांतले 60 वर्सां पिराये वयल्या लाखांनी ज्येश्ठ नागरिकांक दरेका म्हयन्याक सुमार 30 कोटी रुपया वितरीत करतात. येवजण सुरू जाले उपरांतच्या वर्सांत खूबश्या लाबार्थी ज्येश्ठ नागरिकांक मरण आयलां. तरी लेगीत तांच्या बँक खात्यांत येवजणेचो लाव वता, अशें मुखार आयलां. सरकाराचो हो फुकट वचपी पयसो आडावपा खातीर खात्यान पयल्या पांवड्यार 80 वर्सां पिराये वयल्या मनशांच्या घरा वचून सर्वे केला. मरण येवन लेगीत तांच्या नांवार येवजणेचो लाव घेवपी 500 परस अदीक जाणांची नोंद फाटल्या 20 दिसांनी जाल्या, अशें पंचवाडकार हांणी सांगलें.
पयल्या पांवड्यार 80 वर्सां पिराये वयले जाल्यार दुसऱ्या पांवड्यार 75 ते 80 पिराय गटांत, तिसऱ्या पांवड्यार 70 ते 75 पिराय गट, चवथ्या पांवड्यार 65 ते 70 आनी पांचव्या पांवड्यार 60 ते 65 पिराय गटांतल्या मनशांचो सर्वे करतले, अशें पंचवाडकार हांणी सांगलें. ‘डीएसएसवाय’ येवजणेचो लाव घेवपी लाबार्थीन गोंयांत रावप गरजेचें आसा. तरी लेगीत कांय लाबार्थी गोंया भायर वचून रावतात, जाल्यार कांय जाण दिल्ल्या नाम्याचेर रावना, अशें सर्वेंत दिसून आयलां. ते खातीर अश्या लाबार्थींचो नेमको नामो स्पश्ट जायना, ते मेरेन तांकां मेळपी लाव स्थगीत दवरपाचोय निर्णय खात्यान घेतला, अशें पंचवाडकार हांणी सांगलें.
दिल्ले पयशे परतून घेतले
‘डीएसएसवाय’ येवजणेचो लाव घेवपी मनीस भायर पडल्यात तांचो लाव बंद जाले उपरांत येवजणे खाला खर्च जावपी पयशांची व्हड प्रमाणांत बचत जातली. तशेंच अश्या मनशांच्या बँक खात्यांत येवजणे खाला जमा जाल्ले पयशे लेगीत परतून घेतले. ते खातीर येवजणेंत आनीक पारदर्शकता येवपाक मजत जातली, अशें संचालक अजीत पंचवाडकार हांणी स्पश्ट केलें. समाज कल्याण खात्यान सुरू केल्ल्या सर्वेक ज्येश्ठ नागरिकांनी प्रतिसाद दिवचो, असोय उलो तांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
