भांगरभूंय | प्रतिनिधी
वट्ट डिमॅट खात्यांचो आंकडो 13.93 कोटीनी हुंपलो
नवी दिल्ली, खबरां संस्था ः डिसेंबर 2023 वर्सा डिमॅट खातें उगडपाचो विक्रम जाला. सेंट्रल डिपॉझिटरी सर्व्हिस आनी नॅशनल सिक्युरिटीज डिपॉझिटरीच्या आंकडेवारी प्रमाण डिसेंबरांत उगडिल्ल्या डिमॅट खात्यांचो आंकडो 41.78 लाखां वयर आसा. म्हयन्या आदीं हो आंकडो 27.81 लाख आनी वर्सा आदीं 21 लाख आशिल्लो. वट्ट डिमॅट खात्यांचो आंकडो 13.93 कोटी हुंपला, जी म्हयन्या आदल्या तुळेंत 3.1 टक्क्यांनी आनी वर्सा आदल्या तुळेंत 28.66 टक्क्यांनी वाडल्या.
डिमॅट खात्यांत वाड जावपाचीं कारणां
० शेअर बाजारांत वाड
शेअर बाजार सातत्यान नवे उंचेले पांवड्यार पावला आनी आयपीओक लागून गुंतवणूकदारांचो बाजारपेठेचेर आशिल्लो विस्वास वाडला. हालींच्या काळांत अस्थिरताय आनी फायदो घेवपाची स्थिती आसून लेगीत बाजारांत तेजी उरपाची अपेक्षा आसा अशें एका विश्लेशकान सांगलें.
० 2023 वर्सा सेन्सेक्स आनी निफ्टी ह्या दोनूय कंपनींनी 18.8% आनी 20% वाड जाली. जाल्यार बीएसई मिडकॅप आनी बीएसई स्मॉलकॅपात 45.5% आनी 47.5% वाड जाली. देखून डिसेंबरांत डिमॅट खात्यांत वाड जाली.
० घटमूट भारतीय अर्थवेवस्था
Q2 FY24 चो जीडीपी डेटा 30 नोव्हेंबराक जाहीर केल्लो, जो आरबीआयच्या अपेक्षां परस 7.6 टक्क्यांनी चड आसलो. आरबीआयन अर्थीक वर्स 2024 च्या दुसऱ्या तिमाहींत जीडीपीत 6.5 टक्क्यांनी वाड जावपाचो अदमास केल्लो. हाचे भायर जीएसटी वसुली लेगीत बरी अर्थवेवस्था दाखोवपाक लागल्या.
12 म्हयन्यांत 20 कोटी डिमेट खातीं
बँकेच्या फुडारपणा खाला ब्रोकर्सानी नेटान वाडपी बाजारांत थ्री-इन-वन खात्याची सुविधा दिवन व्हड गिरायकांक आकर्शीत केला. मेहता इक्विटीजचे संचालक प्रशांत भन्साळी हांणी सांगलें फुडल्या 12 म्हयन्यांत 20 कोटी डिमॅट खात्यां मेरेन पावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
