भांगरभूंय | प्रतिनिधी
अजय गावडे हांणी एसएजीचो घेतलो ताबो
पणजी : राष्ट्रीय खेळां धोरणाचे फाटभूंयेर येवपी डिसेंबर म्हयन्या मेरेन गोंयां खातीर स्वतंत्र खेळां धोरण हाडटले. हे खातीर खेळां मळावेल्या सगल्या भागधारकांक विस्वासांत घेतले अशें खात्याचे संचालक डॉ. अजय गावडे हांणी सांगलें. सोमारा तांणी गोवा खेळां प्राधिकरणाच्या (एसएजी) कार्यकारी संचालक पदाचो उरिल्लोय ताबो घेतलो. ह्या वेळार ते माध्यमां कडेन उलयले. ताचे पयलीं एसएजीच्या कर्मचार्यांनी व्हडा उमेदीन ताका येवकार दिलो.
गावडे हांणी सांगलें, केंद्र सरकारान ’राष्ट्रीय खेल नीती २०२५’ जारी केल्या. हाचो आदार घेवन राज्यांक आपापलें खेळां धोरण तयार करपाक सांगलां. हे प्रमाण गोंयां खातीर नवें खेळा धोरण तयार करतले. हातूंत प्रशिक्षक, संघटणा, खेळगडे, खेळां मोगी अशा सगल्यांचीं मता लक्षांत घेतले. सध्या राज्यांत २००९ चे खेळां धोरण आसा. ह्या १६ वर्सानी खेळां मळार जायते बदल जाल्ल्यान नवें धोरण हाडप गरजेचें.
तांणी म्हणलें, गोंयान खेळां मळार उदरगत करचे खातीर खेळां खातें आनी एसएसजी हांणी एकठांय काम करप गरजेचें. वेगवेगळें काम करिनासतना दोनूय विभाग एकवटान ही जापसालदारकी स्विकारतले. एसएसजीकडेन बरे प्रशिक्षक आसात. तांकां योग्य मार्गदर्शन तशेंच उर्बा मेळप गरजेचें. खात्याचो ताबो घेतले उपरांत लक्षांत आयिल्ल्यो समस्या सोडयतले. आमी राज्यांत खेळां पर्यटन चालीक लावपाचोय यत्न करतले.
सगल्या म्हालांत खेलो गोवा केंद्र
गावडे हांणी सांगलें, खेलो इंडिया केंद्रांचे फाटभूंयेर राज्यांतल्या सगल्या म्हालांनी बेगीनूच खेलो गोवा खेळां केंद्र सुरू करतले. मदींच कांय कारणांक लागून बंद आशिल्लो खेळां पुरस्कार ह्यान पयलीं सावन परत सुरू करतले.
खेळां साधन सुविधाचो सांबाळ करपा खातीर आराखडो
राज्यांतली खेळां साधन सुविधा, खेळां संकुल आदींचो सांबाळ करपा खातीर आराखडो तयार करतले. हे विशीं मुख्यमंत्री आनी खेळां मंत्री हांचे वांगडा चर्चा करतले. उपरांत ह्यो पीपीपी तत्वाचेर वा खेळां संघटणांक दिवपा विशीं विचार करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
