भांगरभूंय | प्रतिनिधी
गोंयांत ४ लाख वांगडी नोंदणीचें उद्दिश्ट पक्षान केलें पुराय
पणजी : प्रदेश भाजप संघटनात्मक वेंचणुकेची प्रक्रिया डिसेंबर मेरेन पुराय जावन नव्या प्रदेश अध्यक्षांची निवड जातली, अशी म्हायती प्रदेश भाजप अध्यक्ष सदानंद शेट तानावडे हांणी दिली. गोंयांत ४ लाख वांगडी नोंद करपाचे उद्दिश्ट पुराय जालां, अशेंय तांणी सांगलें.
वेंचणूक प्रक्रियेचो नियाळ घेवपा खातीर भाजपाची आयतारा बसका जाली. हे बसकेक मंडळ समितीचे पदाधिकारी हाजीर आशिल्ले. वेंचणूक प्रक्रिये विशीं मंडळाचे मुखेली आनी पदाधिकार्यांक मार्गदर्शन केलें, अशें तानावडे हांणी सांगलें. बसकेक वेंचणूक अधिकारी प्रेमानंद म्हांब्रे, मंत्री सुभाष शिरोडकार, आदले खासदार अॅड. नरेंद्र सावयकार, अॅड. विश्वास सतरकार, सभापती रमेश तवडकार, फ्रान्सीस सिल्वेरा आनी हेर फुडारी हाजीर आसतले.
राज्यांत ४ लाख वांगडी नोंदणीचे उद्दिश्ट पुराय जाल्ल्यान आतां वेंचणूक प्रक्रियेक सुरवात जातली. येवपी २९ नोव्हेंबराक मार्गदर्शनपर कार्यशाळा जातल्यो. पक्षाची राष्ट्रीय पदाधिकारी रेखा वर्मा आनी राज्याचे प्रभारी आशिष सूद हे कार्यशाळेक हाजीर आसतले. हे कार्यावळींत वेंचणुकेची कार्यावळ निश्चीत जातली. राष्ट्रीय मळार संघटणात्मक वेंचणुकेची प्रक्रीया जानेवारी मेरेन पुराय जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
