भांगरभूंय | प्रतिनिधी
भांगरभूंय । प्रतिनिधी
म्हापशेंः स्पीड गव्हर्नर बसोवपाच्या कामात सूसुत्रताय हाडपा खातीर तशेंच खर्चाचें वजें पडचें न्हय हे खातीर उत्तर गोंय टुरिस्ट टॅक्सी असोसिएशनान हे स्पीड गव्हर्नर बसोवपाचें काम वाहन डिलर वा कंपन्यांक करपाक सांगचें अशी गोंय सरकारा कडेन मागणी केल्या. मुख्यमंत्री डॉ प्रमोद सांवत हणजुण्या आनी कळंगुटे विकसीत भारत यात्रा कार्यावळी खातीर आयिल्ले कडेन ह्या मागणीचें निवेदन तांणी तांका सादर केलें.
स्पीड गव्हर्नर आशिल्ली वाहनां मेळनात. ती घेतल्या उपरांत तातूंत ही यंत्रणा बसयल्यार वाहनाच्या कामगिरीचेर ताचो परिणाम जाता, शिवाय इन्सुरन्साचो प्रीमियम वाडटा. वाहना धेतल्या उपरांत स्पीड गव्हर्नर बसोवपाक बोल्सांतल्यान खर्च करचो पडटा अशी बाजू असोसिएशनान मुख्यमंत्र्यां सामकार मांडली. स्पीड गव्हर्नर बसयले बगर आरटीओ टॅक्सीक फिटनेस प्रमाणपत्र दिनात ही गजाल तांणी मुख्यमंत्र्याचे नदरेक हाडून दिली.
खाजगी वाहन धनी आपलीं वाहनां पर्यटकांक दिवपाचें अजून बंद जाल्लें ना. वाहतूक खात्याच्या अधिकाऱ्यांक ताचेर बंदी घालपाक लावची, तशेंच सीसीटीव्ही कॅमेच्याचे फुटेजी वयल्यान घातिल्ल्या दंडाची म्हायती रोखडीच धाडपाक सांगचें. कारण जो वाहन घेवंन गेल्लो ताणे तें परत हाडून दितगीर दंडाची म्हायती दितात आनी आमकां तो दंड फारीक करचो पडटा अशें टॅक्सीवाल्यांनी सांगलें. अॅप आधारीत टॅक्सी सुरू केल्यार आमी उपाशी पडटले, तेन्ना ही सुविधा स्कॅप करपाची मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
