डिजीटल सेवेक फायदो जातलो?

भांगरभूंय | प्रतिनिधी

हे सेवेचो सगल्यांत व्हडलो फायदो म्हणल्यार दुर्गम, दोंगराळ वाठारांत केबल, टाॅवर नासतना इंटरनेट मेळटलें.

इंटरनेटाचो गैरवापर चल्ला म्हूण आॅस्ट्रेलियेन 16 वर्सां सकयल्या भुरग्यांक तें वापरपाक बंदी घाल्या. इंटरनेटाक लागून मेळपी सोशल मिडिया आनी हेर वेबसायटीचो समाजाक खूब धोको आसा, ही गजाल खरी आसली, तरी दुसरे वटेन उदक, वीज, रस्तो हांचे इतलेंच इंटरनेटूय लोकां खातीर म्हत्वाचें, गरजेचें आसा, हें विसरून चलचें ना. मनोरंजनूच न्हय, तर म्हायती, शिक्षण, नोकरी, वेवसाय, धंदे, उद्देग, सुरक्षा, सरकार सगल्यांचीच तें बुन्याद जालां. आतां तर तें इतलें खोलाये मेरेन रिगलां की तें बंद जालें जाल्यार शेंकड्यांनी गजाली बंद जातल्यो, अर्थवेवस्था कोसळून समाजाक फटको बसतलो. पूण, हें इंटरनेट मेळोवपाक केबल कनेक्शन वा टाॅवर लागतात. ह्यो साधनसुविधा आसात, त्याच वाठारांत तें मेळटा. तांचे बगर इंटरनेट आसून नासून सारकेंच. आमच्यो फुडारिल्ल्या गोंयांत पसून हीच समस्या आसा. आतां ती पयस करपाक सरकार स्टारलिंक कंपनीची मजत घेतलें. कालूच कंपनीच्या वरिश्ठ अधिकाऱ्यां कडेन भासाभास जाली. रोखडीच राज्यांत डिजीटल सुविधा निर्माण करपाचें काम कंपनी सुरू करतली. अजून निमणी मान्यताय मेळूंक ना. ती मेळ्ळी जाल्यार घडये फुडल्या वर्सा स्टारलिंकाची सेवा सुरू जावं येता.
स्टारलिंक ही स्पेसएक्स कंपनीची उपगिऱ्याचेर आदारीत इंटरनेट सेवा. उद्देगपती एलोन मस्क हे तिचे धनी. पारंपरीक ब्राॅडबॅण्डा बदला अंतराळांतल्या सॅटेलायटा वरवीं ही सेवा मेळटा. म्हणल्यार जंय केबल, टाॅवर नात त्या खंयच्याय वाठारांत, खाची- कोनशांनी पसून. इंटनेटाचो वेग 50 ते 250 एमबीपीएस आनी लेटेंसी (डेटा मेळपाचो वेग) 20 ते 50 मिलीसेकंद इतलो आसा. म्हणल्यार व्हिडियो काॅल, गेमिंग, डावनलोडूय सहज जावंक शकता. भारतांत ही सेवा सुरु जातली, अशें तांचे वेबसायटीचेर आसा. डीश आनी रावटर लागतलो. सध्या जंय स्टारलिंकाची इंटरनेट सेवा मेळटा थंय ती म्हारग आसा. म्हयन्याक तीन हजार रुपयां पसून सुरू जाता. मात भारतांत ताचें मोल उणें आसपाक शकता. कारण चलनांतलो फरक. तें हेर सेवां परस उणें आसल्यार स्टारलिंकाक गिरयाक मेळटलें. घडये सरकारुय आपल्या सेवां खातीर ताचो वापर करपाक शकता. हे सेवेचो सगल्यांत व्हडलो फायदो म्हणल्यार दुर्गम, दोंगराळ वाठारांत केबल, टाॅवर नासतना इंटरनेट मेळटलें. फक्त डीश बसोवपाचें. सध्या कंपनीन भारतांत नेटवर्क गेटवे आनी साधनसुविधा उबारपाचें काम चालू केलां.
नुस्तेमारी, शिक्षणीक संस्था, भलायकी केंद्रांक स्टारलिंकाचे इंटरनेट सेवेची पुरवण जातली. पर्यटन मळाकूय ताचो खूब फायदो जातलो. आपत्ती वेवस्थापन पसून हे सेवेक जोडूं येता. अजून गोंयांतल्या दोंगराळ वाठारांत फोन चलना. कांय थारावीक कंपनीचें नेटवर्क तर फक्त शारांतूच मेळटा. वेगवान इंटरनेट मेळ्ळ्यार सरकाराच्यो आॅनलायन सेवा सामान्य लोकां मेरेन पावतल्यो. हे खातीर स्टारलिंकाचें योगदान म्हत्वाचें थारूं येता. पूण वेबसायटी अपडेट करच्यो पडटल्यो. त्यो हाताळपाक कुशळ, आळसाय करीनासतना काम करपी मनीसबळ जाय पडटलें. म्हत्वाचें म्हणल्यार चडांत चड सरकारी सेवा इंटरनेटाचेर हाडच्यो पडटल्यो. खास करून आरटीओ, दाखले, परवाने मेळपाची सुविधा बी. चडांत चड कारभार आॅनलायन जाल्यार लोकांचो मोलादीक वेळ वाटावतलोच, वयल्यान भ्रश्टाचारुय उणो जातलो.
स्टारलिंक आसूं वा आनीक कोणूय सगल्यो सरकारी सेवा कागदाविणें मेळप ही काळाची गरज. फक्त सरकारीच न्हय, तर निमसरकारी संस्था, म्हामंडळांनीय आपले वेव्हार, अर्थीक दिवप- घेवप सगलें आॅनलायन केल्यार बरे. तशें केल्यार सरकारी यंत्रणे वयलो लोकांचो विस्वास वाडटलो. फुडाराक वेंचणुकेचें मतदान पसून आॅनलायन जावंक जाय. मात ते खातीर खात्रेची इंटरनेट सुविधा जाय. स्टारलिंकाक लागून इंटरनेट सेवेंत बरो बदल जावं येता. तशें जाल्यार गोंयच्या डिजीटल मळा वयली ती क्रांती थारतली. पळोवया!!