भांगरभूंय | प्रतिनिधी
नवी दिल्ली, खबरां संस्था ः देशांत सायबर गुन्यांव नेटान वाडत आसात. भारतीय रिझर्व्ह बँकेच्या अहवाला प्रमाण, भारतांत 2023 ह्या अर्थीक वर्सा 30 हजार कोटी रुपयां परस चड बँक फटवणूक जाल्या. फाटल्या दशकांत भारतीय बँकांनी फटवणुकेच्या 65,017 प्रकरणांची म्हायती दिल्या. तातूंत 4.69 लाख कोटींचें लुकसाण जालां. सायबर गुन्यांवकार लोकांक फटोवपा खातीर यूपीआय, क्रेडीट कार्ड, ओटीपी, नोकरी आनी डिलिव्हरी घोटाळे सयत वेगवेगळीं युक्ती वापरतात. ह्याच घोटाळ्यां मदीं लोकप्रिय आशिल्ली एक नवी पद्दत म्हळ्यार “डिजिटल हाऊस अरेस्ट”.
“डिजिटल हाऊस अरेस्ट” म्हणल्यार कितें?
डिजिटल हाऊस अरेस्टांत सायबर गुन्यांवकार बळींची तांच्या घरांत फटवणूक करतात. एआय जनरेटेड आवाज वा व्हिडियो कॉल वरवीं ते चड करून पुलीस अधिकारी, सीबीआय एजंट वा कस्टम अधिकारी आशिल्ल्याचे सांगतात. गुन्यांवकार संभाव्य बळींचेर आधार वा फोन नंबरा वरवीं चुकीचें काम केल्ल्याचो आरोप करतात आनी अटक जावपाची भिरांत घालतात. अटक जावची न्हय वा हें प्रकरण बंद करपाच्या बदलाक पयशांची मागणी करतात. पयशे हस्तांतरीतय करपाक बळी तयार जाता. हाकाच डिजिटल हाऊस अरेस्ट अशें म्हणटात.
सायबर फटवणुकेंत गुन्यांवकार पिडितांक अटक केल्ल्याचें लेगीत नाटक करूंक शकतात. तशेंच बनावट पुलीस स्टेशनां वा सरकारी कार्यालयां स्थापन करप, पुलीस वर्दी घालप अश्यो युक्ती वापरतात. हाका ‘डिजिटल अरेस्ट’ अशें म्हण्टात.
डिजिटल अरेस्ट स्कॅम कसो टाळचो?
अशे कॉल वा संदेश आयिल्ल्या उपरांत रोखडीच म्हायती दिवची. ही फटवणूक आडावपा खातीर सरकारान सांचर साथी वेबसायटींत चक्षु पोर्टल सुरू केला. तशेंच सायबर गुन्यांव मदत लायन 1930 वा www.cybercrime.gov.in हाचेरुय म्हायती दिवंक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
