भांगरभूंय | प्रतिनिधी
म्हायती तंत्रज्ञान कायद्या खाला अधिसुचोवणी जारी
ईमेल पासवर्ड ब्रेक, व्हॉट्सअॅप हॅक करपाक मेळटलो
मोबायलांतली म्हायती कॉपी करपाची मेकळीक
भांगरभूंय । प्रतिनिधी
पणजी : मोबायल, संगणक वा हेर स्वरुपांतली डिजिटल म्हायती सोदून काडून ती जाणून घेवपाचे अधिकार आतां गोंयच्या पुलीस म्हानिरिक्षकाक (आयजीपी) आसतले. म्हायती तंत्रज्ञान कायद्या खाला हे विशींची अधिसुचोवणी जारी जाल्या. मात आपत्कालीन स्थितींतूच ही म्हायती सोदपाचे अधिकार आसात. तशेंच हे विशींची लेखी कळोवणी गृह खात्याक दिवची पडटली.
डिजिटल म्हायती सोदून काडपा खातीर ईमेलाचो पासवर्ड ब्रेक करप, व्हॉट्सअॅप हॅक करप वा फोन टॅप करप हे पद्दतीचो वापर आतां आयजीपीक करपाक मेळटलो. एकाद्या मोबायला वयल्यान गेल्ले कॉल वा आयिल्ले कॉल, मॅसेजी सोदून काडप शक्य जातलें. तशेंच ईमेला वयल्यान धाडिल्लो मजकूर वा आयिल्लो मजकूर सोदून काडपाक मेळटलो. तशेंच कंप्युटर वा मोबायलांत सांठोवन दवरिल्ली म्हायती लेगीत सोदून काडून ती कॉपी करपाची मेकळीक आसतली.
म्हायती तंत्रज्ञान कायदो 2000 हातूंत आपत्कालीन स्थितींत सरकारी यंत्रणाक डिजिटल म्हायती तंत्रज्ञानाचे मजतीन सोदपाचो अधिकार आसा. ह्याच कायद्या खाला 2009 वर्सा नेम तयार जाल्यात. ह्या नेमा खाला गृह खात्यान अधिसुचोवणी जारी केल्या. मात ही म्हायती घेवच्या तीन दीस पयलीं गृह सचिवाक कळोवचें पडटलें. गृह सचिवान सात दिसां भितर मान्यताय दिवची पडटली. मान्यताय दिले उपरांतूच एकादो संगणक वा मोबायलांतली म्हायती सोदप शक्य जातलें. गोंयांत चोरयो तशेंच दरोड्यांचें प्रमाण वाडत आसा. हे भायर सायबर गुन्यांवांचें प्रमाण वाडत आसा. चोरी वा दरोड्याचो तपास करपा खातीर दुबावीत वा हेर संबंदितांचो मोबायल ताब्यांत घेवन कॉल वा मॅसेजी जाणून घेवचे पडटात. हाचे वयल्यान तपास करप सोंपें जाता. सायबर गुन्यांवांचो तपास करपा खातीर ईमेल वा कंप्युटरा वयली म्हायती मेळोवन ती तपासप गरजेचें थारता. सुरक्षेचे उपाय वा गुन्यांवांच्या तपासा खातीर म्हूण डिजिटल स्वरुपांतली म्हायती जाणून घेवप पुलिसांक गरजेचें थारता. हाचे खातीर डिजिटल म्हायती जाणून घेवपाचे अधिकार आयजीपीक दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
