भांगरभूंय | प्रतिनिधी
वचलच्या पुलीस स्टेशनांत जाल्ल्या अर्थीक भानगडी उपरांत आतां पुलीस खात्यान तालांवाचे पयशे फक्त डिजिटल पद्दतिनूच स्विकारपाचो निर्णय घेतला. येत्या शेनवारच्यान हे नवे पद्दतीन तालांवा दितले. कांय पुलीस तालांव दिवचे बदला गाडयेकारां कडल्यान निळी नोट घेतात. म्हणल्यार एकमेकांक साह्य करून दोगूय एकमेकांक अर्थीक मजत करतात. हाचें सरकाराक मात लुकसाण जाता. अर्थांत ह्या बेकायदेशीर करणेचो बुडकुलो पुलिसांच्याच माथ्यार फोडपाक मेळचो ना. गाडयेकारूय तितलेच जापसालदार. कांय जाण तर सरळ, ‘कितले घेतलो?’, अशें विचारतात. पांचशे रुपया तालांवाच्या जाग्यार 100 रुपयांत काम जाता जाल्यार ते खूश आनी हे वटेन सरकाराचे तिजोरेचें पडूं पाड, म्हजें बोल्स भरलें काय जालें, हे वृत्तीचे कांय पुलीस (सगलेच न्हय) समाधानी. तालांवाचेरूच म्हयन्याचो खर्च भागोवपी पुलीस आसात खंय. आतां खरें, फट तांकांच खबर!! ह्या डिजिटल जावपाच्या निर्णयाचो सरकाराक फायदो जातलो अशी आस्त आमी बाळगुया.
गोंय पुलीस खात्याक तालांवा वरवीं वर्साक लाखांनी रुपया मेळटात. सरकारी उत्पन्नाचो हो एक व्हडलो स्रोत, अशें म्हणल्यार अतिताय थारची ना. थारावीक दिसा (खरें म्हणल्यार गाडयेकार येरादारी नेम पाळटात कांय नात, हें सदांच पळोवपाक जाय.) येरादारी पुलीस रस्त्यां कुशीक रावतात आनी येवपी- वचपी गाडयेकारांक तालांव घालतात. अर्थांत कांय गाडयेकारूय नेम मोडटना सांपडटात. कांयच ना जाल्यार हॅल्मॅट नाशिल्ले, सीट बेल्ट लावंक नाशिल्ले मेळटातूच. कांय जाण येरादारी पुलीस दिसले काय पयस अर्द- पाऊण वर उबे रावतात वा दुसरे वाटेन वतात. तर थोडे तालांव फारीक करपाक फाटीं फुडें पळयनात. तांकां ती अभिमानाची गजाल बी दिसता आसुये. कांय पुलीस भायल्या राज्यांतली मोटार, ट्रक आडायतातूच. फाटीं म्हाल घेवन येवपी ट्रक ड्रायव्हरांनी गोंयांत पावल दवरलें काय तालांव दिवचोच पडटा, अशें वक्तव्य केल्लें. तालांवा खातीर गाडी आडावपी पुलीस गाडयो मात बारीकसाणेन तपासून मुखार धाडिनात. नाजाल्यार गोंयच्यान गेल्लो सोरो कर्नाटक पुलीस वा अबकारी अधिकारी जप्त करचे नाशिल्ले.
तालांव कॅशलेस केलो तरी गाडयेकारांक तो सोमतोच भरपाक लावंक जाय. फक्त पावती दिली आनी मागीर भरपाक सांगल्यार तो फारीक जायतूच हाची खात्री ना. कारण 7- 8 फावटी तालांव भरुंक नाशिल्ले गाडयेकार आसात. विमो काडिनासतना पसून गाडी चलोवपी आसात. पुलिसांनी तांचे सायटी वयलो डाटा तपाशीत जाल्यार हें कोडू सत्य मुखार येतलें. कार्ड वापरून, क्यूआर कोड, पेटीएम, जीपे वयल्यान तालांव भरपाक मेळटलो. येरादारी खात्याच्या वॅबसायटी वयल्यानूय तो फारीक करपाक मेळटलो. पुलिसांच्या हातांत रक्कम उरची ना. पूण, तालांव दिवचे बदला उणे पयशे घेवन गाडयेकारांक सोडपाचे प्रकार वाडूं येतात. अश्यो साबार प्रतिक्रिया सोशल मिडियाचेर आयल्यात. अर्थांत पयशे बोल्सांत उडोवन सरकाराक लुकसाण करचें काय नेम मोडप्याक बुद्द शिकोवन सरकाराक येणावळ मेळोवन दिवची, हाचो विचार संबंदितांनी करपाक जाय.
एआय सिग्नल यंत्रणा बसयल्या. नेम मोडपी गाडयेकाराक ती तालांव दिता. तांबडें सिग्नल पेटिल्लें आसतना गाडी मात्शी पसून मुखार सरली जाल्यार तालांवाचो एसएमएस येता. अर्थांत ते पांचशे रुपया गाडयेकार फारीक करतात काय नात, ताची तपासणी पुलीस खात्यान केल्या? हें एआय सिग्नल पुराय राज्यांत सुरू करपाक जाय. निदान मुखेल रस्त्यांचेर, म्हामार्गांचेर तरी. म्हणटकच तालांव दिवपी पुलिसांक पावसांत, वतांत रस्त्यांचेर उबे रावपाची गरज पडची ना. हें मनीसबळ दुसरे कडेन वापरूंक मेळटलें. सगले कडेन एआय सिग्नल जायत जाल्यार तालांवाचो पयसो कोणाच्या बोल्सांत वच्चो ना आनी सरकाराची तिजोरीय सदचे परस चड भरतली. कारण येरादारीचे नेम मोडपाक आमी फिशाल, पयसोय हातांत खुळखुळटा म्हणटकच आमी म्हयन्याक दोन- तीन तालांव पसून सहज फारीक करपाक शकतात. खरें म्हणल्यार म्हयन्याक दोन तालांव पडल्यार संबंदीत गाडयेकाराचो परवानो आठ दीस निलंबीत करपाक जाय.
डिजिटल तालांवाक थोड्यांचो तेंको आसा. पारदर्शकताय येतली, गाडयेकारांक पयशे घेवन हेडपाची गरज ना, तशेंच भ्रश्टाचार सोंपतलो, अशें तांकां दिसता. अर्थांत हें जातलें काय ना, हो वादविवादाचो विशय. जाण्ट्यांक वा जांकां डिजिटल तंत्रज्ञान वापरूंक कळना, तांकां हे पद्दतीन तालांव फारीक करपाक अडचण येतली अशें विरोधकांक दिसता. ठकसेनाक लागून डिजिटल वेव्हार धोक्याचे जाल्यात. सरकारान बँक खात्यांक मोबायल नंबर जोडून दवरला, ताका लागून हे धोके वाडल्यात. तरीय
डिजिटला बगर पर्याय उरूंक नात, हेंय आमी मतींत दवरूंक जाय. सीसीटीव्ही कॅमेरे आसात, त्या जाग्यारूच तालांव दिवप शक्य आसा?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
