भांगरभूंय | प्रतिनिधी
नवी दिल्ली, खबरां संस्था ः भारताचें स्वताचें अधिकृत डिजिटल चलन आसा. कांय दिसां आदीं भारतीय रिझर्व्ह बँकेन देशांतलें पयलें डिजिटल चलन ‘ई- रूपी’ बाजारांत हाडलें. अजून ते चांचणेच्या टप्प्यांत आसा.
आरबीआयचे गव्हर्नर शक्तिकांत दास सोमारा ‘जी-20 टेकस्प्रिंट फायनल’ वेळार उलयताले. एका देशांतल्यान दुसऱ्या देशांत फारीकणी संबंदीत समस्यां, खर्च, गती आनी मर्यादीत प्रवेश विशीं ते उलयले. ह्या प्रसंगाचेर ताणें ‘ई-रुपी’ च्या फुडारा विशीं व्हडलें विधान केलें.
फुडाराक शिमे भायर जावपी वेव्हारांत भारताचो ‘ई रुपी’ प्रभावी थारूंक शकता अशें दास हांणी सांगलें. देखून अशा वेव्हाराचो खर्च निश्चीतपणान उणो जातलो. तशेंच, तें चड वेगान आनी सुरक्षीतय आसतलें. व्हड प्रमाणांत भारतीय लोक परदेशांत काम करतात, थंयच्यान ते भारतांत पयशे धाडटात. देखून अभ्यासा खातीर परदेशांत वचपी विद्यार्थ्यां खातीर ई-रुपी वेव्हार सवाय करतले.
‘ई-रुपी’ सारकिल्ल्या केंद्रीय डिजिटल चलनाचो वापर वाडत जाल्यार शिमेभायर फारीकणी करप सोंपें जातलें अशें दास हांणी सांगलें. तशेंच ई-रुपी बेगीनूच चड बँको, शारां आनी लोकांच्या वापरा खातीर उक्तो करपाची आसा अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
