भांगरभूंय | प्रतिनिधी
नवी दिल्ली, खबरां संस्था ः फाटल्या 11 वर्सांत भारतांत डिजिटल क्रांतींतल्यान प्रशासन, भौशीक सेवा आनी हेर जायत्या मळार इतिहासीक बदल घडल्यात. प्रधानमंत्री नरेंद्र मोदी हांच्या फुडारपणा खाला डिजिटल इंडिया फकत संकल्पनाच न्हय तर बदलाचे एक उदाहरण थारला. तंत्रगिन्यानाची नवी पद्दत गांवगिऱ्या वाठारांनी बदल घडोवन हाडपाक म्हत्वाची थारल्या. ह्या नव्या बदलाक लागून गांवगिऱ्या वाठारांत बरेच बदल जाल्यात.
यूपीआय आनी डिजिटल पेमेंट
डिजिटल वेव्हाराचें मुखामळ बदलपाक युनिफायड पेमेंट्स इंटरफेसान (यूपीआय) मुखेल भुमिका साकारल्या. दिसपट्ट्या वेव्हारा खातीर यूपीआय हें एक मुखेल माध्यम जालां. मार्च 2025 वर्सा फकत एका म्हयन्यांत यूपीआय वरवीं 24.77 लाख कोटी रुपयाचें 18,301 दशलक्ष वेव्हार जाले. आयज 46 कोटी परस चड आनी 6.5 कोटी परस चड वेपारी यूपीआय वापरतात.
आधार आनी डीबीटी वरवीं पारदर्शकता
आधारान डिजिटल वळख चड विस्वासांत घेवपा सारकी केल्या. ई-केवायसी आनी सेवा वितरण सादें आनी सोंपे केलां. एप्रिल 2025 मेरेन 141.88 कोटी आधार तयार जाल्यात. ताचे कडेन संबंदीत फायद्याची रक्कम 43.95 लाख कोटी रुपया डायरेक्ट बेनिफिट ट्रान्सफर (डीबीटी) वरवीं हस्तांतरीत केल्या. हातूंतले 5.87 कोटी बोगस रेशन कार्डा आनी 4.23 कोटी डुप्लीकेट गॅस कनेक्शन काडून उडयल्यात.
डिजिटल जोडणींत क्रांती
5जी सुरवात आनी 4.74 लाख बीटीएस टॉवर सुरू जाल्ल्यान भारत संवसारांतलो सगळ्यांत वेगान 5जी रोलआउट दिवपी देश थारला. भारत नेट येवजणेंतल्यान 2.14 लाखां परस चड ग्रामपंचायतींक वेगान चलपी, अतिवेगवान इंटरनॅटान जोडल्यात. हाका लागून जायत्या गांवांनी डिजिटल सेवा पावल्या.
भलायकी आनी शिक्षणीक मळार बदल
कोविड पोर्टला प्रमाण, 220 कोटी परस चड कोविड लसीकरण केला. ताचो ट्रॅक रेकॉर्ड दवरला. संवसारांतल्या सगळ्यांत व्हडल्या लसीकरण मोहिमेत भारताचो आसपाव आसा. सादारण सेवा केंद्रां (सीएससी) भारताच्या गांवगिऱ्या वाठारांतल्या 5.97 लाख केंद्रां वरवीं बँकींग, विमो आनी शिक्षण सारकिल्ल्यो सेवा दितात.
भास, साक्षरता आनी प्रशिक्षण
भाशिनी प्लॅटफॉर्म 35+ भाशांनी सेवा दिता. हातूंत भाशेची आडखळ काडून उडयल्या. प्रधानमंत्री ग्रामीण डिजिटल साक्षरता अभियान (पीएमजीडीशा) वरवीं 6.39 कोटी गांवकारांक डिजिटल साक्षर केल्यात. “कर्मयोगी भारत” पोर्टला वरवीं 1.07 कोटी सामान्य सेवकांक डिजिटल प्रशिक्षण दिलां.
तंत्रगिन्याना वरवीं आत्मनिर्भरताये कडेन वाटचाल: IndiAAI मिशन
IndiAAI मिशन, इंडिया सेमीकंडक्टर मिशन आनी संरक्षण क्षेत्रांतल्या स्वदेशीकरणान व्हड उदरगत केल्या. ह्या येवजण्यांक लागून भारत तंत्रगिन्यानाच्या मळार स्वावलंबनाचे दिकेन नेटान वता. मे 2025 मेरेन भारताची जीपीयू क्षमता वाडून 34 हजारां परस चड जाल्या आनी 1.55 लाख कोटी रुपयांच्या सेमीकंडक्टर प्रकल्पांक मान्यताय मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
