भांगरभूंय | प्रतिनिधी
अहमदाबाद, खबरां संस्थाः फाटल्या कांय दिसांनी देशांत डिजिटल अरेस्ट वरवीं फटवणूक करपाच्या प्रकरणांनी व्हड प्रमाणांत वाड जाल्या. अशाच एका प्रकरणांत बिरेस्तारा गुजरातांतल्या अहमदाबाद सायबर गुन्यांव पुलिसांनी रशियन नागरिकाक अटक केली. अनातोली अलेक्झांड्रोविच मिरोनोव्ह अशें अटक केल्ल्या दुबाविताचें नांव आसा.
चड म्हायती प्रमाण, फोनाचेर पुलीस अधिकारी आशिल्ल्याचें सांगून कागाळदाराक डिजिटल अरेस्ट करून ताची 17 लाख रुपयांची फटवणूक केल्ल्या प्रकरणांत ताका अटक केल्या. ह्या प्रकरणांत पयलीं नदीमखान पठाण आनी मेहफूजालम उर्फ इम्रान मसूदालम शाह ह्या दोन भारतीय नागरिकांक अटक केल्या.
अधिकृत निवेदना प्रमाण, रशियेचो नागरीक मिरोनोव्ह सध्या पुणे शारांत रावता. पिंपरी चिंचवाडच्या पुलीस स्टेशनांतय ताचे आड गुन्यांव नोंद जाला. अनवळखी व्यक्तींन फटोवपाचें कट रचलो आनी पिडीत मनशाक आपूण दिल्ली पुलीस मुखेल कार्यालयांतल्यान कस्टम इन्स्पेक्टर उलयता अशें सांगून फोन केलो. आरोपीन पिडीत मनशाच्या नांवान मलेशियाक धाडिल्लें एक पार्सल मेळ्ळें. तांतूत 16 बनावट पासपोर्ट, 58 एटीएम कार्ड आनी 140 ग्राम एमडीएम ड्रग्स अशो बेकायदेशीर वस्तू मेळ्ळ्यात. उपरांत ताणें पिडित मनशाच्या बँक खात्यांतल्यान कोणे तरी मनी लाँड्रिंग केलां अशें खोटें सांगून धमकायले. उपरांत आरोपीन दिल्लीच्या वसंत कुंज पुलीस स्टेशनांतलो पुलीस अधिकारी आशिल्ल्याचें सांगून पिडित मनशाक डिजिटल अरेस्ट केले.
उपरांत पीडित मनशान आपलो बँकेचो तपशील तांकां धाडलो, उपरांत आरोपीन ताच्या खात्यांतल्यान 17 लाख रुपया चोरले. ते उपरांत सायबर क्रायम पुलिसांनी पठाण हाका अटक केल्ली. चोरिल्ली रक्कम हस्तांतरीत करपा खातीर पठानान स्वता जायते बँक खातीं तयार केल्ल्याचो आरोप आसा. चीनांतल्या एका बॉसाच्या आदेशा प्रमाण चोरी केल्ल्या कांय पयशांचें क्रिप्टोकरंसींत रुपांतर केल्ल्याचोय आरोप पठानाचेर आसा. ह्या प्रकरणाचो फुडलो तपास सुरु आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
