भांगरभूंय | प्रतिनिधी
भांगरभूंय | प्रतिनिधी
पणजी : केंद्रीय अन्वेशण ब्युरो (सीबीआय) आनी भारतीय दूरसंचार नियामक प्राधिकरणाचो (ट्राय) अधिकारी आसा म्हूण सांगून, डिजिटल अरेस्ट करून एका ज्येश्ठ नागरिकाक 2.14 कोटी रुपयांक लुटपाचो प्रकार मुखार आयलां. मनी लाँड्रिंग प्रकरण उक्तडार आयलां आनी तातूंत तुमचें बँक खातेंय आसा अशें सांगीत डिजिटल अरेस्ट करीत ताका 2 कोटी 14 लाखांक लुटलो. ह्या प्रकरणांत सायबर विभागान रोहन जाधव (25, नाशीक) हाका अटक केल्या.
पुलिसांनी दिल्ल्या म्हायती प्रमाण आसगांवच्या नरेश गोयल ह्या ज्येश्ठ नागरिकान ह्या प्रकरणांत कागाळ दाखल केल्या. अज्ञात व्यक्तीक व्हॉट्सअॅप कॉल करून ताका डिजिटल अरेस्ट करून 30 मे सावन वेगवेगळ्या बँक खात्यांनी पयशें भरपाक लायलें. आतां मेरेन ताणें 2 कोटी 14 लाख 40 हजार 132 रुपया त्या खात्यांनी जमा केल्यात.
सायबर विभागाक ही खातीं नाशिकांतली म्हूण कळटाच, आनी ती कोणाच्या नांवांर आसा ते कळटाच अधिक्षक राहुल गुप्ता आनी अतिरिक्त अधिक्षक अक्षत आयुश्य हांच्या मार्गदर्शना खाला निरिक्षक दीपक पेडणेंकार हांच्या फुडारपणा खाला उपनिरिक्षक कुणाल वेर्लेकार, काँन्स्टेबल सिद्धेश पाळणी, आदित्य नायक हांचो पंगड नाशिकाक गेलो आनी दुबाविताक धरलो. ताका गोंयांत हाडून अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
