भांगरभूंय | प्रतिनिधी
नवी दिल्ली, खबरां संस्था ः डिजिटल अरेस्ट सिंडिकेटां कडेन संबंदीत आशिल्ल्या 5 जाणांक दिल्ली पुलिसांनी अटक केल्या. तांणी सगळ्यांनी दिल्लींत रावपी 81 वर्सां पिरायेच्या निवृत्त लश्करी सैनिकाक डिजिटल अरेस्ट पद्दतीन 15 लाखाक फटयलें.
पिडितेन 8 डिसेंबर 2024 दिसा नॅशनल सायबर गुन्यांव रिपोर्टिंग पोर्टल (एनसीआरपी) कडेन फटींगपणाची कागाळ दाखल केल्ली. हाचे उपरांत दिल्ली पुलीस सायबर सेल ह्या प्रकरणाची चवकशी करताले. दिल्लीच्या पहाड़गंज वाठारांतल्यान इम्रान कुरेशी, असद कुरेशी, देव सागर आनी जावेद हांकां पुलिसांनी अटक केल्या. मुखेल आरोपी अभिषेक यादव हाका मध्य प्रदेशांतल्या इंदौरांतल्यान अटक केल्या.
पुलिसांनी दिल्ले म्हायती प्रमाण, हे सगळे चीनी कंपनींत काम करताले. उत्तर प्रदेशांतल्या झांसी सावन तें कंपनी चलयताले. थंयच्यान डिजिटल अरेस्टाच्यो घडणुकी घडटाल्यो. आरोपीन जाण्ट्या पिडित बायलेक व्हिडियो कॉल केलो. ताणें आपली वळख ईडी अधिकारी अशी सांगलें. मनी लाँड्रिंग प्रकरणांत ताचें नांव आशिल्ल्याचें पिडितेक सांगलें. तांकां अटक जावची न्हय तर 15 लाख रुपया दिवचे अशें सांगलें. हाचे उपरांत तांणी पिडिते कडल्यान 15 लाख रुपयांची फटवणूक केली.
कागाळी उपरांत ह्या प्रकरणाची चवकशी करतना झांसी सावन सिंडिकेट चलता अशें कळ्ळें अशें पुलिसांनी सांगलें. गुन्यांवकारांनी अनवळख्या लोकांच्या नांवान जायतीं बँक खातीं उक्तीं केल्लीं. फटीची रक्कम तें वरवीं हस्तांतरीत केल्ली. मुखेल आरोपी अभिषेक यादव टेलिग्राम अॅपा वरवीं चीनी कंपनी कडेन संपर्कांत आशिल्लो. ताणें चीनी कंपनीक शंबरां परस चड बँक खात्यां विशीं म्हायती दिली.
आरोपीं कडल्यान 11 स्मार्टफोन, 6 एटीएम, लॅपटॉप आनी जायत्या बँक खात्यांची चेकबुक जप्त केला, अशें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
