भांगरभूंय | प्रतिनिधी
पणजी: रेजीनाल्डाचे साहित्यकृतीचेर प्रबंध बरोवपाक तरणाट्यांनी मुखार येवंक जाय अशें फाऊस्तो दा कोस्ता हांणी सांगलें.
डिकेएच्या वतीन शिवोलेच्या सेंट अँथनी चर्च सभाघरांत रेजिनाल्ड फेर्नांडिसाची जयंती व्हडा उमेदीन मनयली.
तरणाट्यांक रेजिनाल्ड हांणें बरयिल्ल्या कादंबरीचेर डॉक्टरेट करपाची गरज आशिल्ल्यान तांचें साहित्य वाचपा खातीर मुखार येवपाक जाय अशें गुलाब मासिकाचे संपादक फाऊस्तो दा कोस्ता हांणी सांगलें.
ह्या वेळार मुखेल सोयर म्हूण सेंट अँथनी चर्चीचे पॅरिश पाद्री सुकर मेंडीस हांणी म्हळें रेजिनाल्डो फेर्नांडिसान कोंकणी साहित्याच्या मळार व्हड योगदान दिलां. ते शिवोलेचें रत्न आसून आमी तांकां आदर्श मानपाची गरज आसा. ताच्या योगदानाची याद आनी आदराची खूण म्हूण आमी तांचो पुतळो हांगा उबारपाची गरज आसा.
ह्या वेळार साल्वादोर फेर्नांडीस, डिकेएचो अध्यक्ष सेल्सो फेर्नांडीस, सचीव फादर मारयन जेसन बार्रेटो, भांडारी आफोन्सो ब्रागांझ आनी हेर मानेस्त माचयेर हाजीर आशिल्ले. ह्या वेळार मानेस्तांनी रेजिनाल्ड बाबाच्या फोटवांक फुलां-हार अर्पण केले.
रेजिनाल्ड फेर्नांडिसाचो जल्म 14 जून 1914 ह्या दिसा शिवोले गांवांत जालो. तो गोंयचो उत्कृश्ट कादंबरीकार आनी फामादीक रोमी कोंकणी लेखक, तांकां रोमानशीचो पातशाय ह्या नांवान वळखतात. ताणें 150 परस चड कादंबरी बरयल्यांत. ताच्या कामाची पडताळणी केल्या उपरांत तांचो हो वावर दिसून येता. देखून ताच्या साहित्याचेर प्रबंध बरोवपाची गरज आसा. कोंकणी साहित्याचो प्रसार आनी रक्षण करपा खातीर तो एक प्रेरणा जावन आसा अशें कार्यावळीचे मुखेल उलोवपी फाऊस्तो दा कोस्ता हांणी सांगलें.
अध्यक्ष सेल्सो फेर्नांडीस हांणी रेजिनाल्डान कोंकणी साहित्याक चालना दिवपा खातीर केल्ल्या त्यागाची म्हायती दिली. तोमाझीन कार्दोज आनी ब्राझ हांणी तांच्या जिणेचेर उजवाड घालपी तांच्यो यादीं सांगल्यो. स्वता रेजिनाल्डा हांणी रचिल्लीं गितां राबीन आनी रुबी दियेपियेत्रो, एलिसन डिसौजा, ब्राझ फेर्नाडिस, डॅनियल मेंडिसो मातिल्दा फेर्नांडिस हांणी गायलीं. फादर मारयन जेसन बार्रेटोन मानेस्तांक येवकार दिलो. जाल्यार, मॅगन डिसोजान सुत्रसंचालन केलें. तशेंच आफोंन्सो ब्रागांझ हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
