भांगरभूंय | प्रतिनिधी
चीनाचो ग्रॅण्डमास्टर डिंग लिरेनान जबरदस्त पुनरागमन करतना संवसारीक बुद्दीबळ वस्तादपण सर्तीचे 12वे फेरयेंत रशियेच्या इयान नेपोम्नियाशीक हारयलो.
ह्या डावा पयलीं रशियेच्या नेपोम्नियाशी ही सर्त सहज जिखतलो अशे दिशिल्लें. पूण, सेगीत चार डाव बादाबाद दवरल्या उपरांत लिरेनान काल उत्कृश्ट रितीन जैत जोडून सर्तींत 6-6 अशी बरोबरी सादली. आतां फकत दोनूच फेरयो बाकी आसा. ताका लागून कोण वस्ताद थारतलो हें स्पश्ट सांगप कठीण जाला.
धव्या घुलांनी खेळपी लिरेनान काल कोले सिस्टम ओपनींग वरवीं नेपोक ताचे तयारी पसून पयस दवरपाची रणनिती आपणायली आनी अखेरेक ताची ही रणनिती येसस्वी थारली. तरी आसतना खेळ संतुलीत आशिल्लो. पूण, 11वे चालींत लिरेनान उंटान नेपोचो घोडो मारून दोनूय राजांची स्थिती दुबळी करपाचो निर्णय घेतलो. हाचो फायदो नेपोक चड जालो. आनी ताणें आपली स्थिती घटमूट केली. ताका लागून लिरेनान आपलो वजीर सक्रिय करपाचो निर्णय घेतलो. खेळाचे 27 सावन 29 वे चाली मेरेन नेपो कडेन लिरेनाच्या राजाचेर आक्रमण करपाच्यो तीन संदी आशिल्ल्यो. पूण, तिनूय संदी ताणें वगडायल्यो. ते उपरांत लिरेनान राजाचेर आक्रमण करतना 38वे चालींत जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
