भांगरभूंय | प्रतिनिधी
भावंडांनो,
भुरगेंपणातूच धाडशी सभाव, प्रवाहा आड पेंवपाची जिद्द, खंयचेय परिस्थितीचेर मात करून देश, समाजा खातीर जीण ओंपपी आनी इतिहासांत दिपस्तंभ जावन फुडले पिळगेक मार्ग दाखोवपी म्हान व्यक्तिमत्व म्हणल्यार डॉ. बाबासाहेब आंबेडकर. 6 तारखेर पुण्यतिथी निमतान देशान तांकां आर्गां ओंपलीं. भावंडांनो, आमीय आयज तांकां नमळायेन वंदन करून आर्गां ओंपूया. ही तांचे विशींची थोडी म्हायती.
भावंडांनो, तांचो जल्म 14 एप्रील 1891 त महू गांवांत जालो. आवय भिमाबाय. देखून पाळण्यातूच तांकां भीम नांव पडलें. मुळनांव भीमराव सकपाळ. भुरगेपणांतूच खर बुद्द, तरतरीत, तितलोच मस्तोय बी. मोडटलो पूणून बागवचो ना हेच सभावाचो. बापूय रामजी लश्कराच्या सुभेदार, मेजर पदा वयल्यान निवृत्त जातकच शाळेंत ते मुख्याध्यापक म्हण वावुरले. उपरांत साताऱ्याक आयले. थंय तांणी बांदकाम खात्यांत स्टोअर किपर म्हण काम केलें. भीमरावांचें शिकप साताऱ्याकच जालें. पांच- स वर्सांचो आसतना ताची आवय संवसाराक अंतरली. बापूय तर ताचे पिरायेच्या दुसऱ्या वर्साच देवा घरा गेल्लो. आवयच्या उपरांत मिरा आत्यान ताका वाडयलो. शाळेंतल्या आंबेडकर गुरुजींचो तांचेर खूब जीव आशिल्लो. तो केन्ना- केन्नाय दनपारच्या वेळा खातीर ताका भाकरी हाडटालो. हजेरी पटाचेर तर गुरुजीन ताचें नांव भिमा रामजी आंबेडकर अशेंच बरयल्लें. गुरुजींक लागुनच भिमा सकपाळ भिमा आंबेडकर जालो. ताका जिवितांत वेगळोच अणभव आयलो तो चवथे यत्तेंत, इंग्लीश शाळेंत. भायर सगळे कडेन समान वागपी भिमाक शाळेंत जातीभेदाक लागून वेगळो बसचो पडलो. सकयचे जातींतलो म्हणून ताका संस्कृत शिकपाक दिलें ना. ती गजाल ताच्या काळजाक लागली. उपरांत ताणें इत्सा भागयलीच. तो संस्कृत शिकलोच.
भावंडांनो, भिमराव गरिबींत कसोतरी मॅट्रीक पास जालो. ताची बुद्द, हुशारकी पळोवन बडोद्याच्या सयाजीराव गायकवाड म्हाराजांनी तांचो पत्कर घेतलो. ताका फुहल्या शिक्षणा खातीर कोलंबिया विद्यापिठांत धाडलो. ह्या उपकारांची जाण दवरून भिमरावान एम्.ए. चें शिक्षण पुराय केलें. उपरांत पी.एच्.डी केली. इतलेंच न्हय तर इंग्लंडाक वचून एम्.एस्.सी केली आनी ‘बार एट लॉ’ पदवी घेवन परतून मांयभुंयेंत पावल दवरलें. भावंडांनो, तुमी जाणात शिक्षणाचो ध्यास लागिल्ल्या आंबेडकरांनी जिवितांत वट्ट 32 पदव्यो मेळयल्यो. तांचे इतलें शिक्षण घेवपी ते वेळार तरी भारतांत कोण नाशिल्लो.
भावंडांनो, भारतांत तांकां जातीभेदाचो त्रास जावंक लागलो. लोकांचे थोमणे तांकां सोसना जाले. तेच वेळार गायकवाड म्हाराजांनी तांकां आपल्या लश्करांत लश्कर कार्यवाह म्हणून नेमले. परतून लोकांच्या अपमानान भिमरावांक बडोद्याक दीस काडप कठीण जालें. ते बेजारून मुंबय आयले. शाहू म्हाराजांच्या आदारान तांणी मुक्तांक हें पाक्षीक उजवाडाक हाडलें. ‘बहिश्कृत हितकारिणी सभा’ नांवांची संस्था उबारली. महाडांत अस्पृशांची परिशद भरिल्ली. हजारांनी अस्पृश्य थंय जमिल्ले. ते परिशदे वेळार हजारांच्या वर्सांची परंपरा मोडून सगळ्यानीं भिमरावांच्या मुखेलपणा खाला चवदार तळ्याचें उदक पिले. हाकाच लागून भिमराव सामाजीक बंडखोर म्हण नामनेक पावले.
भावंडांनो, 1947 वर्सा ते भारताचे कायदो मंत्री जाले. ‘दी अनटचेबल्स’ हो ग्रंथ तांणी बरयलो. संविधानाचे शिल्पकार म्हणून आयजवेर ते अज्रंवर उरल्यात. ह्या म्हान फुडाऱ्याक 6 डिसेंवर 1956 दिसा मरण आयलें. भावंडांनो, तांच्या उगडासान आयज आमी तांकां आर्गां ओंपुया.
उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
