डावनलोड स्पिडींत जियो सगल्यांत मुखार

भांगरभूंय | प्रतिनिधी

ट्रायचो अहवाल : गोंयांत बीएसएनएलाचो कॉल ड्रॉप दर चड

भांगरभूंय । प्रतिनिधी

पणजी : गोंयांत बीएसएनएल मोबायल सेवेचो कॉल ड्रॉप दर सगल्यांत चड म्हणल्यार 3.94 टक्के आसा. जाल्यार अ‍ॅरटेलाचो सगल्यांत उणो फक्त 0.43 टक्के आसा. डेटा डावनलोड स्पीडींत जियो मुखार आसा. भारतीय दूरसंचार विनिमय प्राधिकरणाच्या (ट्राय) सर्वेक्षणांतल्यान ही म्हायती मेळ्ळ्या. हे खातीर प्राधिकरणान जुलयांत गोंयांतल्या विवीध वाठारांनी तपासणी केल्ली.

ट्रायान वास्को, कोलवा, कुंकळ्ळी, केपें, दवर्ली, मडगांव, वेर्णे, बांबोळी, मिरामार, पणजी कदंब बसस्टॅण्ड वाठार, पणजी मार्केट, मांडवी पूल, गोंय वैजकी म्हाविद्यालय ह्या विठारांत विवीध चांचण्यो घेतिल्ल्यो. तातूंत वट्ट 261.8 किलोमिटराचो शार वाठार, 3.9 किलोमिटराचो दर्यादेग वाठार, 8.9 किलोमिटराची चलत केल्ली चांतणी आनी 9 भौशीक हॉटस्पॉट हांचो आस्पाव आशिल्लो. तातूंत कॉल येसस्वी तरेन लागप, कॉल ड्रॉप, डावनलोड आनी अपलोड वेग हाची तपासणी केली.

अहवाला प्रमाण बीएसएमएल उपरांत व्होडाफोन- आयडियाचे (व्हीआय) कॉल ड्रॉप 1.27 टक्के आशिल्ले. जियोचे 0.62 टक्के जाल्यार अ‍ॅरटेलाचे सगल्यांत उणे म्हणल्यार 0.43 टक्के आशिल्ले. जियोंत कॉल येसस्वी तरेन लागपाचो दर सगल्यांत चड म्हणल्यार 99.18 टक्के आशिल्लो. जियो नॅटवर्कांत कॉल चालू आसतना अचकीत आवाज वचपाचें प्रमाण (कॉल म्यूट) 2.55 टक्के आशिल्लें. अ‍ॅरटेलांत कॉल म्युटाचें प्रमाण 2.48 टक्के जाल्यार व्हीआयंत 1.98 टक्के आशिल्लें. बीएसएनएल व्होल्ट तंत्रज्ञानाचो वापर करिनाशिल्ल्यान कॉल म्युटाचें प्रमाण कळूंक ना.

वायफाय हॉटस्पॉटांत अ‍ॅरटेल मुखार

अहवाला प्रमाण वायफाय हॉटस्पॉटांत अ‍ॅरटेल सगल्यांत मुखार आशिल्लें. अ‍ॅरटेलाक (5 जी) दर सेकंदाक 178.70 एमबी डावनलोड स्पीड मेळ्ळी. जियोक 157.02 एमबी दर सेकंदाक स्पीड मेळ्ळी. बीएसएनएल आनी व्हीआयचे (दोनूय 4 जी) डावनलोड स्पीड वळींत 1.15 एमबी आनी 37.61 एमबी दर सेकंद आशिल्ली.