भांगरभूंय | प्रतिनिधी
मनशाचे पूर्वज खरेंच वानर आशिल्ले जाल्यार अर्द मनीस आनी अर्द वानर आशिल्ल्या जीवांचे जीवाश्म पुष्टी म्हूण मेळपाची अपेक्षा आमी करता आसली. पूण अशे तरेचे जीवाश्म केन्नाच मेळूंक नात. आमकां फकत मनशांचे वा वानरांचे जीवाश्म मेळ्ळ्यात.
चार्ल्स रॉबर्ट डार्विन हाणें केल्ल्या शास्त्रीय प्रगतीचे यादींत आनी आमच्या समाजांत विज्ञानाच्या म्हत्वाच्या वावराचेर चिंतन करपाखातीर 12 फेब्रुवारीक डार्विन दीस म्हूण मान्यताय मेळ्ळ्या. कालूच तो सगले कडेन मनयलो. ताणें तयार केल्ल्या उत्क्रांती सिद्धांताक ‘डार्विनवाद’ अशें म्हण्टात. 1859 वर्सा ताणें आपल्या ‘द ओरिजिन ऑफ स्पीसीज’ ह्या ग्रंथांत आपले विचार उजवाडाक हाडले. ह्या ग्रंथांत ताणें सगळ्यो जाती एकाच पूर्वजा पसून अवतरल्यात, थोड्या बदलां वरवीं काळांतरान एकामेकां पसून विकसीत जाल्यो, अशें मत मांडलें. पूण फाटल्या दोन दशकां सावन शास्त्रज्ञ ह्या सिद्धांताच्या मुळाव्या गृहीतकांचो उक्तेपणान विरोध करतात.
डार्विनचो सिद्धांत ताचे वैधते खातीर ठोस पुरावे सादर करपाक अपेशी थारलो. पयलो जीव, सगळ्या जातींचो तथाकथित पूर्वज कसो अस्तित्वांत आयलो हाची जाप दिवपाक तो अपेशी थारलो. फुडें निर्जीव द्रव्य एकठांय येवन सजीव जीव तयार जावंक शकतात हो ताचो सिद्धांतूय अपेशी थारलो जेन्ना हे समोर आयले कि maggots मांसांत उत्स्फूर्तपणान उत्पन्न जायना पूण दोळ्यांक अदृश्य आशिल्ल्या अळम्याच्या रुपान माशी तांका व्हरता.
जीवशास्त्रज्ञ फ्रांसिस हिचिंग हाणें आपल्या ‘द नेक ऑफ द जिराफ : व्हेअर डार्विन वेंट रॉन्ग’ ह्या पुस्तकांत म्हळां : जीवाश्म मेळ्ळ्यार आनी डार्विनचो सिद्धांत बरोबर आसल्यार त्या खडपांत कितें आसपाक जाय हाचो अदमास काडूं येता; अशे fossils सांपडपाक जाय जे प्राण्यांच्या एका गटांतल्यान उंचेल्या पांवड्या वेल्या प्राण्यांच्या दुसऱ्या गटा कडेन वतात . सलग पिळग्यांनी जावपी ‘किरकोळ सुदारणा’ स्वता प्रजातीं भशेन सहजतायेन सांबाळपाक जातात, पूण अशें केन्नाच घडूंक ना. खरें म्हणल्यार ताचे उरफाटें खरें, जशें डार्विनान स्वता कागाळ केल्ली; ‘असंख्य संक्रमणकालीन रुपां अस्तित्वांत आसूंक जाय, पूण तीं धर्तरेच्या कवचांत असंख्य आंकड्यांत आमकां कित्याक मेळनात?’. जीवाश्म नोंदींतली ‘अत्यंत अपूर्णता’ ही फकत चड जीवाश्म खणपाची गजाल अशें डार्विन हाका दिसलें. पूण चडांत चड जीवाश्म खणून काडिल्ल्यान तातूंत चडशे सगळे सद्याच्या जिव्या जनावरां भशेनूच आशिल्लें.
जिवीत झाडा सारकें आसूंक जाय, एक समान मुळ आसपाक जाय, उपरांत वेगवेगळ्या फांट्यांत फाटीं पडपाक जाय अशें सांगपी डार्विझम सिद्धांताच्या विपरीत, प्राणी पयलेच खेपे उदयाक आयिल्ल्या खिणा सावन खूब वेगळे आनी गुंतागुंतीचे आसात. आयज खबर आशिल्ले सगळे प्राणी एकाच वेळार, सुमार 55 कोटी वर्सां पयलीं कॅम्ब्रियन युग त्या भूगर्भीय काळाच्या मदीं उदयाक आयले.
सरपटपी प्राण्यांची उत्क्रांती उभयचरांतल्यान जाली असो डार्विनवाद दावो करता. पूण अशा दाव्याची पडताळणी करपाचो कसलोच सोद केन्नाच मेळूंक ना. हाचे उरफाटें उभयचर आनी सरपटपी प्राणी हांचे मदीं तुळा केल्यार दोगांय मदीं व्हड प्रमाणांत शारिरीक अंतर आशिल्ल्याचें दिसून येता आनी “अर्द सरपटपी अर्द उभयचर” प्राणि जगपाची शक्यताय ना. ह्या दोनूय गटां मदल्या शारिरीक अंतरांचें एक उदाहरण म्हळ्यार तांच्या तांतयांच्यो वेगवेगळ्यो रचना. उभयचर आपलीं तांतयां उदकांत घालतात आनी तांचीं तांतयां जेली सारकीं, पारदर्शक आनी पारगम्य पटल आसतात. अशा तांतयांत उदकांत उदरगती खातीर आदर्श रचणूक आसता. दुसरे वटेन सरपटपी प्राणी आपलीं तांतयां जमनीर घालतात आनी ताका लागून थंय तिगून उरपा खातीर तांचीं तांतयां तयार जातात. उभयचरांनी तांतयां जमनीर दवरल्यार तीं ताकतिकेन सुकून गर्भ मरतालो.
डार्विन हाणें 1871 वर्सा उजवाडाक आयिल्ल्या ‘द डिसेंट ऑफ मॅन’ ह्या ग्रंथांत मनीस आनी वानर हे एकाच पूर्वजांतल्यान आयल्यात असो आपलो दावो मांडलो. पूण जीवाश्म नोंदी ह्या परिस्थितीक तेंको दिना. मनशाचे पूर्वज खरेंच वानर आशिल्ले जाल्यार अर्द मनीस आनी अर्द वानर आशिल्ल्या जीवांचे जीवाश्म पुष्टी म्हूण मेळपाची अपेक्षा आमी करता आसली. पूण अशे तरेचे जीवाश्म केन्नाच मेळूंक नात. आमकां फकत मनशांचे वा वानरांचे जीवाश्म मेळ्ळ्यात.
विज्ञानांत – खास करून जीवशास्त्र, जीवाश्मविज्ञान, सूक्ष्मजीवशास्त्र आनी अनुवंशशास्त्र ह्या मळांचेर हालींच जाल्ल्या प्रगतीक लागून उत्क्रांतीचे दावे पुरायपणान खंडित केल्यात. प्रजातींची उदरगत जावन एकामेकांच्यो ‘उपरांत’ आवृत्त्यो जाल्यो ही कल्पना अमान्य मानल्या. एकविसावो शेंकडो सुरू जातकच विज्ञान जिणेच्या उत्पत्तीविशीं प्रस्नाक एकूच जाप दिता ती म्हळ्यार निर्मणी.
सजीव वस्तूंचीं विलक्षण खाशेलपणां आसतात आनी तीं एका श्रेश्ठ बुद्धीमत्तेन आनी गिन्यानान अस्तित्वांत हाडलीं अशें शास्त्रीय सोदा वयल्यान दिसून येता. जीवशास्त्रीय निरिक्षणांतल्यान अशें दिसून येता की एक सजीव प्रजाती दुस-या प्रजातींत बदलूंक शकना आनी त्या कारणाक लागून जर कोणूय काळांत परत वचूंक शकलो जाल्यार निमाणें दर एका प्रजाती खातीर पयलीं अस्तित्वांत आशिल्ल्यो आनी त्यो शून्यांतल्यान निर्माण जाल्ल्यो (प्राणी) मेळटल्यो. देखीक, गरुड सदांच गरुड आशिल्ल्यान, जर आमी काळांत परत वचूंक शकले जाल्यार, शुन्टतायेन निर्माण जाल्ल्या गरुडाची पयली जोडी आनी पंगड आमकां दिसतलें.
उत्क्रांतीवादी जीवशास्त्रज्ञ डग्लस फ्युटुयमा हाणें मान्य केलां: “तीं पुरायपणान विकसीत अवस्थेंत दिसलीं जाल्यार तीं खऱ्यांनीच खंयच्याय सर्वशक्तिमान बुध्दिमत्ते वरवीं निर्माण जाल्लीं आसूंक जाय.”
ही सर्वशक्तिमान बुद्धी म्हळ्यार एकूच सर्वशक्तिमान ईश्वर जाणे शून्यांतल्यान सगळें निर्माण केलां, दरेकल्याक वेगळें खाशेलपण दिला. डार्विन हाणें दिल्लो उत्क्रांतीचो सिद्धांत सृश्टी निर्माणा कडेन आडनदर करता आनी तशेंच मनशाच्या सत्वाचे अध्यात्मीक आयाम, मनशाक ईश्वरी मार्गदर्शनाची गरज ह्या कडेन बेफिकीर वृत्ती निर्माण करता. मानवी मुल्यांचें अस्तित्व आनी ताचें नशीब ईश्वराच्या सर्वशक्तिमत्तेच्या गिरेस्तकायेंतल्यान मुक्त करपाक भाग पाडतात, कर्मांची जापसालदारकी पासून मुक्त करता आनी ताका स्वताच्या स्वतंत्र इत्सेच्या आनी निवडीच्या आवाठांत हाडून समाजीक रचणूक नश्ट करता, संवसारांत आपत्ती हाडटा. विज्ञानीक प्रगती सैमीक निवडी परस सृश्टीच्या निर्माणाच्या सिद्धांताचे दिकेन मुखार वचपाची गरज आसा. तेन्नाच जिणेच्या वास्तवा विशीं अचूक निश्कर्श काडून ह्या संवसारांत आमचो हेत नीतिमान रितीन पुराय जावंक शकता आनी फटींगपणांतल्यान, अंधश्रध्दापसून आम्ही मुक्त जावंक शकता. तशेंच ईश्वरानं दिल्या असंख्य आशिर्वादाचो बरो उपेग करूंक येता
– नजराना दरवेश
8975074456
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
