भांगरभूंय | प्रतिनिधी
भारता सयत संवसारभराच्या साहित्यांत अज्रंवर जाल्ल्या चंद्रा विशीं भारतीयांक परतून एकदां उमळशीक लागल्या. आयज दनपरां 2 जावन 35 मिणटांनी एलव्हीएम राॅकेट चांद्रयान – 3 क घेवन चंद्राचे दिशेन उडटलें. 23 वा 24 आॅगस्टाक ताचेर देंवतलें. इस्रोचे चांद्रयान -2 मोहिमे वेळार यानाक देंवपाक अपेस आयिल्लें. मात, हे फावटी आमच्या शास्त्रज्ञांनी बरीच मेहनत घेतल्या. आयज सगल्या शाळांक विद्यार्थ्यांक युट्यूब चॅनला वयल्यान यानाचें उड्डाण दाखोवचें अशें निर्देश शिक्षण खात्यान दिल्यात. चडशो शाळा दनपरां सुट्टात. ताका लागून कितले विद्यार्थी हो विज्ञानीक खीण पळयतले हो प्रस्न आसाच. तरीय विद्यार्थ्यांच्या मेंदवांत विज्ञानाचें बीं रोवपाचो सरकाराचो हो यत्न तोखणाय करी सारको म्हणचो पडटलो.
भारतीय विद्यार्थी हुशार आसात. विदेशांतल्या आघाडीच्या तंत्रज्ञ, शास्त्रज्ञां मदीं कितलेशेच भारतीय आसात. खास करून आयटी मळाचेर. ल्हान आसतनाच भुरग्यांक विज्ञानाची गोडी लायली जाल्यार शंबरांतले पांच तरी विद्यार्थी ह्या मळार फुडाराक तेंगशेर पावतले, हातूंत दुबावूच ना. अंतराळ विज्ञान हें अशेंच मोनेळ घालपी. सोशल मिडियाचेर अंतराळांतले साबार व्हिडिओ पळोवपाक मेळटात, प्रत्येक व्हिडिओ अविस्मरणीय अशेच आसतात. भुरग्यांकूय ते आवडटात. पालकांनी, शिक्षकांनी विद्यार्थ्यांक विज्ञानाच्या मळार करियर करपाक मजत केली जाल्यार आनीक 15- 20 वर्सांनी आमच्या गोंयांत पसून आंतरराष्ट्रीय पांवड्या वयले शास्त्रज्ञ तयार जावप कठीण न्हय.
ही चांद्रयान – 3 मोहीम सादारण 600 कोटी रुपयांची. चंद्राचे जमनीचो, खास करून दक्षीण वाठाराचो अभ्यास करपाक हें यान सोडलां. तें थंयच देंवतलें. सुरक्षीत देंवलें जाल्यार अमेरिका, रशिया आनी चीना उपरांत चंद्राचेर यान देंवोवपी भारत चवथो देश थारतलो.
16 जुलय 1969 क नासाचें अपोलो 11 हें यान तीन अंतराळविरांक घेवन चंद्रार गेल्लें. नील आर्मस्ट्रॉंग, बझ आल्ड्रीन आनी मायकल कॉलिन्स हे तातूंत आशिल्ले. 20 जुलयाक यानाचो लँडर ‘ईगल’ चंद्राचेर देंवलो आनी आर्मस्ट्राँगान पयलें पावल पृथ्वीच्या ह्या उपगिऱ्याचेर दवरलें. आल्ड्रीन ताचे फाटोफाट देंवलो. काॅलिन्स यानांत रावलो. ह्या इतिहासीक खिणाक ह्याच म्हयन्यांत 54 वर्सां पुराय जातलीं. ‘नासा’च्या ह्या मिशना उपरांत जायत्या देशांनी चंद्राचेर घुरी घाली. कांय जाणांक येस मेळ्ळें, कांय अपेशी थारले. पूण, कोणेच यत्न करपाचे सोडूंक नात. चंद्राच्या अभ्यासाक लागून सूर्यमंडळाचेर आनीक उजवाड पडटलो. अंतराळांतलें तापमान, भायर खंयच्या गिऱ्याचेर मनीस वा हेर खंयचोय जीव आसा काय ना, हाचो अभ्यास करपाक मेळटलो. ते खातीर चंद्राचेर मनशाक रावंक मेळटलें काय ना, हाचेरूय संशोधन चालू आसा. कारण पृथ्वी वयलें गुरुत्वाकर्शण, वातावरण हेर कडेन ना. चंद्राचेर लोकवस्ती उबारपाचो विचार कांय वर्सां सावन शास्त्रज्ञ करीत आसात. म्हायती तंत्रज्ञान मळाकूय चांद्रयान मोहिमेचो फायदो जावं येता.
हाचे पयलीं भारतान चांद्रयान- 1 मोहीम 28 ऑगस्ट 2008 दिसा सुरू जाल्ली. ह्या यानान 12 नोव्हेंबर 2008 क चंद्राचे कक्षेंत प्रवेश केल्लो. तर चांद्रयान- 2 मोहीम 22 जुलय 2019 क सुरू जालें आनी 6 सप्टेंबर 2019 दिसा कक्षेंत पावलें. पूण देंवपाक पावलें ना. आतां यानांत बरेच बदल केल्यात. म्हणटकूच येस मेळपाची चड खात्री आसा. अर्थांत पयलें काम हें यान सुरक्षीत देंवोवप. तातूंत प्रोपल्शन माॅड्युलर, लॅण्डर आनी रोव्हर आसा. लॅण्डर आनी रोव्हर चंद्राचेर देंवतले. मागीर रोव्हराक जमनीर भोंवडावचो पडटलो. हीं कामां जालीं काय फुडें सगलें सहज शक्य जातलें. देंवप आनी थंय पासय मारप चड म्हत्वाचें. खुद्द अमेरिका हे मोहिमेचेर लक्ष दवरून आसा. तातूंत तांचो सुवार्थ आसा. चांद्रयान – 3 मोहिमेचो डाटा तांकां जाय. ते संबंदी तांणी भारता कडेन कबलातूय केल्या. कारण अमेरिका परतून एकदां चंद्राचेर मनीस देंवोवपाची तयारी करता.
भारताचे उदरगतींत भर घालपी हे चांद्रयान- 3 मोहिमेक येश आंवडेवया. ताचे पसून स्फूर्त घेवन भारतीय मनीस चंद्राचेर देवूं. न्हय देंवतलो. तो दीस चड पयस ना… विद्यार्थ्यांनी हें प्रक्षेपण पळोवचें आनी ताचे पसून उर्बा घेवन विज्ञान, तंत्रज्ञान मळाचेर चानयेचो वांटो उखलचो. इस्रोच्या सगल्या विज्ञानिकांक बेस्ट आॅफ लक.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
