डायरी मनांतलो गोंदळ पयस करतली

भांगरभूंय | प्रतिनिधी

दिसपट्टी धांवपळ आनी जापसालदारक्यो मनांत जायते गोंदळ निर्माण करतात.
तातूंतल्यान सुटका मेळोवपाची आसल्यार दर दिसा थोडो वेळ दिवन डायरी बरोवची. तशेंच डायरी बरोवन कितें साध्य करूं येता तें जाणून घेवया.
डायरींत बरयले उपरांत आमकां मनांतल्यान हलके दिसता. जशें -जशें बरयत वयतले तशें- तशें मनांतली चिंता, निर्शेवणी, दुख्खां थीर आनी शांत जातात. मनांत नवे विचार येवपाक आदार जाता.
जेन्ना ध्येय बरोवन दवरतात तेन्ना मेंदवाक ती म्हत्वाची म्हायती म्हणून याद जाता, ध्येया विशीं जितलें चड बरयतात, तितलेच तें साध्य करपाचो यत्न करतात. आनी ध्येया मेरेन पावता.
तुमचे विचार आनी भावना बरोवन दवरल्यार तुमकां तांची चड वळख जाता. तुमचीं नकारात्मक आनी सकारात्मक दोनूय बाजू कळपाक मदत करता.
व्यस्त जिणेंत ताण आसप सादारण. एका अभ्यासा प्रमाण, दिसाक 15- 20 मिनटां अभिव्यक्तीशील बरपावळ केल्यार रगतदाब उणो करपाक आनी ताण उणो करपाक मदत जावंक शकता. डायरी बरयल्यार पद्दतशीर काम करपाची संवय निर्माण जाता, जी येसस्वीपणाचे मुळावे मंत्र. देखून तातूंत दिसपट्ट्यो कामां बरोवपाचो यत्न करात. कांय जाण डायरेचो उपेग करून सृजनशील लेखन बरयतात जशें- कविता, कथा, गितां आदी. अशा विचारांचेर लक्ष केंद्रीत करून मेंदू आनीक कितलेशेच नवे विचार निर्माण करता.