भांगरभूंय | प्रतिनिधी
खबरां संस्था
यूजीनः भारताचो आनी संवसारांतलो अव्वल दर्जाचो जावेलियन थ्रो खेळगडो नीरज चोप्रान डायमंड लीग सर्तीच्या निमाणे फेरयेंत दुसरी सुवात मेळयली. अमेरिकेंतल्या यूनीन शारांत जाल्ले हे सर्तीचे फायनलींत नीरजान 83.80 मीटर लांब जावेलीन मोखून मारलो. चेक प्रसासत्ताकाच्या जेकब वाडलेचान 84.23 मीटर पयस जावेलीन मारून वस्तादपण मेळयलें. फकत 0.44 मीटराच्या फरकान जेकबान नीरजाक फाटीं उडयले.
नीरजाक इनाम म्हणून 12,000 डॉलर (सुमार 10 लाख रुपया) इतली रक्कम मेळ्ळ्या. हाचे पयलीं दोहा हांगचे डायमंड लीक आनी लॉसन डायमंड लीग सर्तींत जैतपदा वांगडा नीरजाक दरेकी 10.000 डॉलर्स (सुमार 8.3 लाख रुपया) मेळिल्ले. तशेंच झ्युरीच हांका जाल्ले सर्तींत उपजैतिपदा वागडा ताका 6.000 डॉलर्स (सुमार 5 लाख रुपये) इनाम मेळल्लें.
डायमंड लिगाच्या निमणे फेरयेंत नीरज ताचे सदचे लयींत नाशिल्लो. तशेंच ताच्या दोन यत्नांत फावल जाले. बाकीच्या तीन यत्नांत नीरजान ताका फावोशी कामगिरी करपाक शकलो ना. जाल्यार जेकब वाडलेचान पयल्या सावन थ्रोची आघाडी कायम दवोरून जेतेपद मेळयलें.
डायमंड लीग 2023चे फायनलींतली नीरजाची कामगिरी फुडले भशेन आशिल्ली. ताच्या पयल्या यत्नांत फावल जालो. दुसऱ्या यत्नांत ताची फेक 83.80 मीटर आशिल्ली. तिसऱ्या यत्नांत ताणे 81.37 मीटर फेक केली. चौथ्या यत्नांत फावल जालो. पांचव्या यत्नांत 80.74 मीटर आनी सव्या यत्नांत ताणे 80.90 मीटर फेक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
