भांगरभूंय | प्रतिनिधी
अॅड. अमित सावंत हांचो सरकाराक प्रस्न
पेडणें: सरकारान मांद्रें मतदारसंघातले, पर्यायान पुराय राज्यांतल्या रस्त्यांचें रुंदीकरण, डांबरीकरण पद्धतीन करचेंच. मात रस्त्यांची रुंदी कितली? हाची म्हायती पयलीं भौशीक बांदकाम मंत्री आनी अधिकार्यांनी थळाव्या नागरिकांक दिवची. हाका लागून फुडाराक गैरसमज नाका. अशी मागणी मांद्रेंचे आदले सरपंच तशेंच आतांचे पंच ऍडवोकेट अमित सावंत हांणी पत्रकारां कडेन उलयतना केली.
गोंयांत आनी खासा करून मांद्रें मतदार संघांत भौशीक बांदकाम खातें, रस्तो विभागा खाला रस्त्यांचीं कामां सुरू आसात. हॉट मिक्स डांबरीकरण कामाची सुरवात जाल्या. मात ह्या रस्त्यांची रुंदाय कितली? असो प्रस्न तांणी केलो.
मेळटा थंय रस्तो रूंद! हाचो अर्थ कितें?
सध्या विंगड विंगड प्रतिक्रिया सोशल मिडियावेल्यान वाचपाक, आयकुपाक मेळटात. जंय रस्ते रूंद करपाक मेळटले थंय एक मिटर, दोन मिटर रस्तो रुंद करात. हाचो अर्थ कितें? असो प्रस्न अॅड. सावंत हांणी केलो.
उच्च न्यायालयाच्या आदेशाचें कितें?
हालींच उच्च न्यायालयान ह्या रस्त्या संबंदी दखल घेवन जीं रस्त्या कुशीक कमर्शियल आनी हेर बांदकामां आसात ती तपासणी करून ताचेर कारवाय करची. असो आदेश दिला. हाका लागून लोकां मदीं भंय निर्माण जाला.
एका म्हयन्या उपरांत आतां पावस सुरू जातलो. पावसा पयलीं रस्त्यांचीं कामां, गटारांचीं कामां हातांत घेवप गरजेचें. सरकार सुविधायो दिवपाचेर भर दिता ही बरी गजाल.
भौशीक बांदकाम अधिकारी पंचायत मंडळांनी आपयले काय कित्याक येनात? पंचायत मंडळ गांवांतले रस्ते किते रूंद आसात? मुखेल रस्त्याचो सेंटर भाग खंयचो? तशेंच बांदकाम खातें रस्तो विभागाच्या अधिकार्यांक विचारपाक पत्र धाडटा आनी अधिकार्यांक आमंत्रित करता. तेन्ना अधिकारी ह्या रस्त्याचेर कित्याक भोंवनात? असो प्रस्न ऍॅड. अमित सावंत हांणी हजर करून रस्त्याची रुंदाय शीम खंयची? हें जर दाखोवन दिल्यार नागरीकूय फुडाराक रस्त्या कुशीक बांदकाम करतना नियंत्रण मेळयतले. मात भौशीक बांदकाम अधिकार्यांचें एक उतर आसता, तें म्हळ्यार विभागाकडेन कर्मचार्यांचो उणाव आसा.
अधिकार्यांनी लोकांक म्हायती दिवची
आता सध्या व्हडा प्रमाणांत डांबरीकरण जातलें आनी हें डांबरीकरण करतना वा उक्तावण कार्यावळीक अधिकारीय हजर आसतात. तेन्ना त्या अधिकार्यांनी थळाव्या नागरिकांक वा रस्त्या कुशीक जांचीं घरां, दुकानां आसात त्या सगल्यांक जागृताये विशीं म्हायती दितना हो रस्तो डांबर घालते इतलोच रूंद आसतलो काय ताचे पलतडीं रस्त्या खातीर गरजेचो जागो आसा? हाची म्हायती दिवपाची गरज अॅड. अमित सावंत हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
