भांगरभूंय | प्रतिनिधी
नवी दिल्ली, खबरां संस्था: दिल्लीच्या लाल किल्ल्याचे सुरक्षे खातीर तैनात केल्ल्या पुलिसांक डमी बॉम्ब मेळूंक ना म्हूण एका मुखेल हवालदारा सयत सात पुलिसांक निलंबीत केल्यात. ही घडणूक २ ऑगस्टाक घडली. दिल्ली पुलिसांनी सोमारा ही म्हायती दिली.
दिल्ली पुलिसांच्या म्हणण्या प्रमाण, १५ ऑगस्टाक स्वतंत्रताय दिसाचे कार्यावळी खातीर दर दिसा पुलीस सराव करतात. शेनवारा स्पेशल सेलचो पंगड साद्या कपड्यांत मॉक ड्रिल करपा खातीर आयलो. लाल किल्ल्यांत ते बनावट बॉम्ब घेवन भितर सरले. तेन्ना किल्ल्याचे सुरक्षितताये खातीर तैनात आशिल्ल्या पुलिसांक बॉम्ब मेळूंक ना. सुरक्षेंत निश्काळजीपणां केल्ले खातीर पुलिसांक निलंबीत केले. स्वतंत्रताय दिसाची मुखेल कार्यावळ लाल किल्ल्यार जाता. प्रधानमंत्री मोदी देशाक संबोदीत करता.
२ ते १६ ऑगस्ट मजगतीं नो फ्लाय झोन
स्वतंत्रताय दिसाच्या सुवाळ्या पयलीं सुरक्षिततायेच्यो येवजण्यो म्हणून दिल्ली पुलीस आयुक्त एसबीके सिंह हांणी २ ते १६ ऑगस्ट मजगतीं लाल किल्लो नो-फ्लाय झोन म्हणून घोशीत केला. निवेदना प्रमाण, भारतीय नागरी सुरक्षा संहिता, २०२३ च्या कलम १६३ खाला पॅरा-ग्लायडर, पॅरा-मोटर्स, हँग-ग्लायडर, यूएव्ही, यूएएस, मायक्रोलायट विमान, रिमोट-कंट्रोल्ड विमान, हॉट एअर बलून, ल्हान आकाराचें विमान चलोवपाक मनाय आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
