भांगरभूंय | प्रतिनिधी
नवी दिल्ली, खबरां संस्थाः संवसारीक भलायकी संघटनेच्या (WHO) अहवाला प्रमाण भारतांतल्या सुमार 30% बायलां तांच्या जोडीदारा कडल्यान जावपी हिंसाचाराक बळी पडल्यात. म्हळ्यार तांकां तांच्या घरकान्न वा जोडीदारां कडल्यान मानसीक, अर्थीक आनी लैंगीक हिंसाचार जाता.
अहवालांत म्हणलां, 15 ते 49 वर्सां पिरायेच्या पांचांतल्या एका बायले वांगडा अशें घडटा. संवसारांतल्या सुमार 84 कोटी बायलां वांगडा जिणेंतल्या खंयच्याय एका वेळार लैंगीक हिंसाचार जालां. 2000 वर्सा उपरांत हो आंकडो व्हडलोसो बदलूंक ना. संवसारीक पांवड्यार 15 ते 49 वर्सां पिरायेच्या 8.4% बायलांचेर तांच्या जोडीदारा भायर हेरां कडल्यान लैंगीक हिंसाचार जाला. भारतांत 15 वर्सां आनी ताचे वयल्या पिरायेच्या सुमार चार टक्के बायलांक तांच्या जोडीदारा भायर हेरां कडल्यान लैंगीक हिंसाचार जाला.
168 देशांच्या आंकड्यां वयल्यान अहवाल…
2000 ते 2023 मेरेनच्या 168 देशांच्या आंकड्यांचेर आदारीत हो अहवाल 25 नोव्हेंबराक जाहीर केला. बायलां आड जावपी हिंसाचारांत सुदारणा जावपाची गती खूब मंद आसा आनी 2030 मेरेन बायलां आड जावपी हिंसाचार ना करपाचें ध्येय साध्य करप कठीण दिसता अशें अहवालांत नोंद केलां. मानवी संकश्ट, झुज आनी हवामान संकश्ट बायलां आड हिंसाचार जावपाचो धोको आनीक वाडयता.
डब्ल्यूएचओ अहवालाच्यो शिफारशी
० हिंसाचार आडावपा खातीर पुराव्यांचेर आदारिल्ल्या कार्यावळींचो विस्तार करप.
० बळी पडपी बायलां खातीर भलायकी, कायदेशीर आनी समाजीक सेवा घटमूट करपाक जाय.
० सुदारणांचो नियाळ घेवपा खातीर सुदारीत डेटा सिस्टम.
० बायलांक आनी चलयांक सशक्त करपी कायदे खरपणान चालीक लावपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
