भांगरभूंय | प्रतिनिधी
सीरम इन्स्टिट्यूट ऑफ इंडिया हांचे कडेन वर्साक 10 कोटी डोस तयार करपाची कबलात
नवी दिल्ली, खबरां संस्था ः संवसारांतल्या मलेरियाच्या दुसऱ्या वासिनाक R21 संवसारीक भलायकी संघटनेन (डब्ल्यूएचओ) मान्यताय दिल्या. फुडल्या वर्सा सावन तें बाजारांत येतलें. एकाच डोसाचो खर्च 166 ते 332 रुपया आसतलो.
बीबीसीच्या म्हणण्या प्रमाण, ही लस ऑक्सफर्ड विद्यापिठान तयार केल्या. संवसारांतली सगळ्यांत व्हडली वासिन कंपनी – सीरम इन्स्टिट्यूट ऑफ इंडिया हांचे कडेन वर्साक 10 कोटी डोस तयार करपाची कबलात जाल्या. मनशाक मलेरिया जाल्यार ह्या वासिनाचे 4 डोस घेवचे पडटले.
२ वर्सां आदीं मलेरियाचें पयलें वासिन मेळ्ळें
डब्ल्यूएचओन 2021 वर्सा पयलें मलेरिया वासिन आरटीएस,एस/एएस01 (RTS,S/AS01) मान्य केली. आमी मलेरियाच्या पयल्या वासिनाक 2 वर्सां आदीं मान्यताय दिल्ली अशें डब्ल्यूएचओचे महासंचालक डॉ. टेड्रोस अॅधानोम गेब्रेयसस हांणी सागले. आतां आमचें लक्ष संवसारभर मलेरियाचें वासिन तयार करपाक निधी एकठांय करपाचेर आसतलें, जाका लागून तें गरजेच्या दरेका देशांत पावूंक शकता. उपरांत संबंदीत देशांचे सरकार मलेरिया नियंत्रणाच्या उपायांत हें वासिन आस्पावचें काय ना हें थारायतले.
डब्ल्यूएचओचे महासंचालक गेब्रेयसस हांणी सांगलें- आरटीएस,एस/एएस01 आनी आर21 हांचे मदीं व्हडलोसो फरक ना. दोगांय मदलो खंयचो चड परिणामकारक थारतलो तें सांगूंक शकना. दोनूय प्रभावी आसात.
हें वासिन प्लाझमोडियम फॅल्सीपेरमला निश्क्रीय करता. प्लाझमोडियम फॅल्सीपेरम हो मलेरिया निर्माण करपी पांच परजीवींतातलो एक आनी तो सगळ्यांत धोक्याचो आसा. डब्ल्यूएचओच्या म्हणण्या प्रमाण दर 10 मदल्या 4 दुयेंतींक हें वासीन फायद्याची थारुंक शकता आनी 10 मदल्या 3 खर दुयेंतींक वाटावंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
