भांगरभूंय | प्रतिनिधी
थंड वातावरणांत जेवण बेगीन बेळशेंना. चड करून जेवण स्टेनलेस स्टिलाच्या डब्यांत भरप, हाॅट बाॅक्स टिफिनांत भरप बरें. तें गरम उरता.
कुलकुल्याची थंडी, घोंग्यांनी पावस परवडलो, पूण न्हय गर्मी. ह्या दिसांनी रांदिल्लें जेवण बेगीन इबाडटा. दनपार मेरेन तें बेळशेता. खास करून टिफीन म्हूण जे डबो घेवन वतात, तांची चड अडचण जाता. कामाक, काॅलेजीक, उद्देग, धंद्याक वचपी बरेच लोक डबो व्हरतात. भायल्या जेवणा परस घरगुती जेवण केन्नाय बरें. चडश्या लोकांक तें आवडटा. थोडे कालचें उरिल्लें जेवण हून करून व्हरतात. सकाळीं केल्लें जेवण डब्यांत बंद केलें काय लंचब्रेक मेरेन तें ताजें उरताच अशें ना. चड करून गिमाच्या दिसांनी तें बेळशेता. मागीर तें जेवप म्हणल्यार दुयेंसांक आमंत्रण.
ह्या रखरखीत दिसांनी शिजयिल्ले अन्नपदार्थ कमीत कमी दोन वरां ताजे उरतात. कुडीचें तापमान तीस- बत्तीस अंश सेल्सियस आसल्यार तें अन्न पिड्ड्यार जाता. कसलोय पदार्थ दोन वरां भितर खावप सगल्यांकूच शक्य जायना. अशा वेळार जेवण फ्रिजांत दवरप बरें. जे लोकबंद डबो घेवन नोकरी, धंद्याक वतात, तांणी जेवणाची चड जतनाय घेवप सामकें गरजेचें. 32 अंश सेल्सियसा वयर आसता थंय एक वर जेवण दवरल्यार तें सुरक्षीत उरता.
थंड वातावरणात जेवण बेगीन बेळशेना. चड करून जेवण स्टेनलेस स्टिलाच्या डब्यांत भरप, हाॅट बाॅक्स टिफिनात भरप बरें. तें गरम उरता. भायले उष्णताये पसून ताची राखण जाता. भोवतेक कार्यालयांनी आतां पेंन्ट्री, फ्रिज आसता. कार्यालयांत पावले बरोबर जेवणाचो डबो भितर दवरप बरें . जेवण खूब वेळ ताजें उरता. फ्रिज नासल्यार एसी आशिल्ले थंडगार कुडींत जेवण दवरचें. डब्यांत आंबट, कोडू जिनस दवरचे न्हय. तातूंत बॅक्टेरिया संसर्ग जावं शकता. डबो भरतना केन्ना गरमागरम भरूं नाकात. मात्सो थंड जावंदी.
दुसरे म्हणजे फ्रिजांतलें अन्न काडले बरोबर खावचें न्हय. तें ओव्हन, इंडक्शन प्लेटीचेर गरम करात. ताका लागून तांतुतल्यो बॅक्टेरिया मरतल्यो. सदांच शीत, हुमण, मसाल्याचें तोंडाक व्हरचे परस केन्ना बटर, जॅम, पी नट, बटर लावन स्लायस ब्रेड, फुलको, रोटी खाल्यार बरें. असले जिनस सहसा इबाडनात. जेवणा वेळार मोसमी फळां, आपोल, केळीं, मोसंबी, संत्रीं, स्ट्राॅबेरी खावप बरें. आडसर तर सामकेंच बरें. हेल्थ इज वेल्थ हें घट मतींत दवरचें.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
