भांगरभूंय | प्रतिनिधी
मॉवीन गुदिन्होः नुतनीकरण केल्ले मुरगांव पालिका इमारतीचें उक्तावण
भांगरभूंय । प्रतिनिधी
मुरगांव : गोंयची उदरगत प्रगतीपथार आसा. ही उदरगत चालूच उरतली. आमचें भाजप डबल इंजीन सरकार उलोवन न्हय जाल्यार काम करून दाखयता. 2027 चे विधानसभा वेंचणुकेंत भाजप उदरगतीच्या आदाराचेर जिखून उदरगतीची गंगा अशीच चालू दवरतलो, अशें पंचायत तशेंच येरादारी मंत्री मॉवीन गुदिन्हो हांणी सांगलें.
नुतनीकरण केल्ले मुरगांव पालिका प्रशासकीय इमारतीचें उक्तावण मंत्री गुदिन्हो हांचे हस्तुकीं जालें. ह्या वेळार ते उलयताले. तांचे वांगडा वास्कोचे आमदार कृष्णा साळकार, नगराध्यक्ष गिरीश बोरकार, उपनगराध्यक्ष रामचंद्र कामत हाजीर आशिल्ले. ह्या वेळार मुख्याधिकारी सिध्दीविनायक नायक तशेंच दयानंद नायक, मंजुषा पिळणकर, कुणाली मांद्रेंकार, दामोदर नायक, दामोदर कासकार, प्रजय मयेंकार, रामचंद्र कामत, योगिता पार्सेकार, नारायण बोरकार, दीपक नायक, शमी साळकार, मतियास मोंटेरियो, प्रिया राऊत, गिरीश बोरकार, फ्रेडरिक हेन्रीक्स, अमेय चोपडेकार, देविता आरोलकार, यतीन कामुर्लेकार, श्रद्धा महाले, विनोद किनळेकार, सुदेश भोसले, लिओ रॉड्रिग्ज हे नगरसेवक, नगरसेविका हाजीर आशिल्ल्यो.
गुदिन्हो हांणी सांगलें, पालिका इमारतीचें 15 कोटी रुपया खर्च करून नुतनीकरण केलां. वास्को नुस्त्यां मार्केट, मुख्याधिकारी बंगलो हीं कामां चालू आसात. बेगिनूच वास्को कदंब बसस्टॅण्डाचें रूपरंग बदलतलें. दाबोळी ते क्वीनीनगर मेरेन 650 कोटी रुपया खर्च करून उड्डाण पुलाचें काम झुजा पांवड्याचेर चालू आसा. ते उपरांत एक हजार कोटीचें क्वीनीनगर ते वेर्णा जंक्शना मेरेनचें काम हातांत घेतले. ते भायर आमचे कडेन दोन आंतरराष्ट्रीय विमानतळां आसात. तीं दोनूय चालूच उरतलीं.
आमदार साळकार हांणी सांगलें, आमी सगळ्या नगरसेवकां वांगडा रावून वास्को शाराची उदरगत फुडें व्हरतात. वास्को शाराची उदरगत चालूच उरतली. तातूंत 18 कोटी रुपया खर्च करून मुख्याधिकारी बंगल्याचें काम, 12 कोटी रुपया खर्च करून स्वातंत्र्य पथाचें सोबितीकरण तशेंच हेर 300 कोटी रुपयांचीं उदरगतीचीं कामां चालू उरतलीं. नगरसेवक दीपक नायक हांणी येवकार दिलो. नगराध्यक्ष गिरीष बोरकार हांणी प्रास्तावीक केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
