भांगरभूंय | प्रतिनिधी
नीळकंठ हळर्णकारः पेडण्यां मनयलो गोंय मुक्ती दीस
भांगरभूंय । प्रतिनिधी
पेडणें: गोंयचे भाग्यविधाते भाऊसायब बांदोडकार हांणी दूरदिश्टी दवरून जे तरेन गांवागांवांत शाळा सुरू करून शिक्षणाची बुन्याद घातली तेच तरेन आतां डबल इंजिनाचें सरकार गांवागांवांनी, शाराशारांनी उदरगत करता. नव्या युगाची आनी नव्या तंत्रज्ञानाची तरणाट्यांक म्हायती दिवन नव्यो रोजगाराच्यो संदी दिता. अशा डबल इंजीन सरकाराक तरणाट्यांनी आदार दिवचो आनी ह्या डबल इंजिना फाटल्यान रावचें, असो उलो नुस्तेमार मंत्री नीळकंठ हळर्णकार हांणी मारलो.
पेडणेंच्या सरकारी संकुलांत 61 व्या गोंय मुक्ती दिसाचे कार्यावळींत मंत्री हळर्णकार मुखेल सोयरे म्हूण उलयताले. ह्या वेळार माचयेर पेडणेंचे उपजिल्होधिकारी दीपक वायंगणकार, मामलेदार आनंद मळीक, संयुक्त मामलेदार अनील राणे, पेडणेंचे नगराध्यक्ष माधव सिनाय देसाय हाजीर आशिल्ले.
प्रधानमंत्री नरेंद्र मोदी आनी मुख्यमंत्री डॉ. प्रमोद सावंत हांच्या फुडारपणा खाला सर्वसामान्यांची उदरगत करपाचो यत्न चल्ला. पेडणें म्हाल गोंयांत नंबर वन करचे खातीर जे तरेन प्रकल्प उबारल्यात, त्या प्रकल्पांचो लाव लोकांनी घेवचो. सरकाराचेर फक्त टिका करून चलची ना. कांय गजाली चुकल्या आसतल्यो, त्यो आपसात चर्चा करून सोडोवपाक मेळटा, अशेंय मंत्री हळर्णकार हांणी सांगलें. सुरवेक पेडणेंच्या व्हायकावंट हायस्कूल आनी सेंट जोसेफ हायस्कुलाच्या विद्यार्थ्यांनी येवकार गीत आनी देशभक्ती गितां सादर केलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
