भांगरभूंय | प्रतिनिधी
भांगरभूंय । प्रतिनिधी
वाळपयः ठाणे शाळा चोम्याचो खेळां महोत्सव डोगुली-ठाणे पंचायत मैदानार व्हडा उमेदीन जालो. ठाणेची सरपंच सरिता गांवकार आनी ठाणे शाळा चोम्याचो अध्यक्ष काशिनाथ नायक हाचे हस्तुकीं मशाल पेटोवन मेळाव्याचें उक्तावण केलें. महोत्सवांत गोळाधली, हिवरें, चरावणे, ठाणे,पाल, सावंतवाडो पाल, नानेली, कोपार्डे हांगच्या सरकारी प्राथमीक शाळांतल्या विद्यार्थ्यांनी वांटो घेतल्लो.
50 मीटर धांवपाचे सर्तीत महोत्सवाक सुरवात जाली. तातूंत सावंतवाडो पालच्या सोहम सहदेव सावंत, रिवेचा रमेश गांवकार आनी गोलाली शाळेच्या गोरांग हाणी इनामां मेळयलीं. विद्यार्थिनींत ठाण्याची आराध्या नायक, गोळावलीच्या रिद्धी च्यारी हाणी इनामां मेळयलीं. ह्या वेळार आनीकूय जायत्यो सर्ती घेतल्यो. तातूंत जैतिवंत जाल्ल्या विद्यार्थ्यांक मानेस्तांचे हस्तुकीं इनामां भेटयली.
खेळाच्या माध्यमांतल्यान विद्यार्थ्यां मदीं आत्मविस्वास वाडीक लागता. भुरग्यांनी सांघीक खेळांत चडांत चड वांटो घेवपाक जाय अशें काशिनाथ नायक हाणे ह्या वेळार सांगले. ठाणे शाळा चोम्याच्या माध्यमांतल्यान वेगवेगळ्यो सर्ती घेतात तशेंच शिक्षणीक उपक्रमाक पुरक अश्योय कार्यावळी आयोजीत करतात अशी म्हायती ताणे दिली. सरपंच सरिता गांवकारान भुरग्यां मदी निकोप सर्त आसपाक जाय. सर्ती आयोजीत करपाक पंचायती वतीन सहकार्य करपाचें उतर तिणे दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
