भांगरभूंय | प्रतिनिधी
थळाव्या लोकांचो निश्चेव : ग्रामसभेंत थाराव मंजूर
भांगरभूंय । प्रतिनिधी
वाळपय : ठाणे पंचायत वाठार प्लास्टीक मुक्त करपाचो निश्चेव पंचायत मंडळ आनी लोकांनी केला. हालींच घेतिल्ले ग्रामसभेंत हे संबंदांतलो थाराव मंजूर केलो. ताची अंमलबजावणी ताकतिकेन करतले. ह्या वेळार लोकांक पंचायती वतीन कपड्याच्यो पोतयो वांटल्यो.
ग्रामसभेक माचयेर सरपंच निलेश परवार, उपसरपंच सोनिया गांवकार, पंच विनायक गांवस, सुभाष गावडे, अनुष्का गांवस, सरिता गांवकार, सुरेश आयकार, तनया गांवकार, पंचायतीचे सचीव सर्वेश गांवकार हाजीर आशिल्ले.
ठाणे पंचायत वाठार प्लास्टीक मुक्त जावपाची खर गरज आसा. हालींच ह्या वाठारांत एके गायीच्या पोटांत 15 कील प्लास्टीक कोयर सांपडलो. प्लास्टीक जैवविविधतायेक खूब घातक आसा. प्लास्टीक पर्यावरणा खातीर घातक आसा. हे खातीर सगल्या लोकांनी पंचायतीच्या ह्या उपक्रमाक आदार दिवचो, अशी विनवणी सरपंच परवार हांणी केली. हे संबंदांतलो थाराव ग्रामसभेंत मांडलो आनी तो सगल्यांनी मंजूर केलो.
ह्या वेळार पंचायती वतीन हाजीर आशिल्ल्या लोकांक कपड्यांच्यो पोतयो वांटल्यो. तशेंच ठाणे सरकारी माध्यमीक विद्यालयांतल्या भुरग्यांक कपड्याच्यो पोतयो दिल्यो. सचीव गांवकार हांणी सांगलें, पर्यावरणाचो सांबाळ करप ही दरेकल्याची लागणूक. पयल्या पांवड्यार कपड्यांच्यो पोतयो वांटल्यात. दुसऱ्या पांवड्यार प्लास्टिकाचो वापर पुराय तरेन बंद करतले. ठाणे पंचायत वाठारांतल्या दुकानकारांनी प्लास्टीक पोतयो विकच्यो न्हय, अशी तांणी विनवणी केली. तशेंच दुसऱ्या पांवड्यार प्लास्टीक पोतयांचो वापर केलो जाल्यार तांचेर दंडात्मक कारवाय करतले, अशें गांवकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
