भांगरभूंय | प्रतिनिधी
सध्याचें युग हें सोशल मिडियाचें युग. आमकां सगळ्यांक हे विशीं खबर आसाच. सोशल मिडियाच्या ह्या युगांत जो तो
सोशल मिडिया सायटींचेर सक्रीय जावन आपूण कसो सोशल आसा तें दाखोवपाचो यत्न करता. व्हॉट्सअॅप, फेसबूक, इंस्टाग्राम, ट्विटर ह्या सोशल मिडियाचेर सक्रीय लोकांचो आंकडो अब्जांनी आसा. हजारांनी, लाखांनी लोकां मेरेन धपक्याक आपले विचार पावोवपाचें सोशल मिडिया हें एक प्रभावी साधन. भुरग्यां सावन व्हडल्या लोकां मेरेन सगलेच सोशल मिडिया वरवीं व्यक्त जातात. ट्विटर सारकी सोशल मिडिया साइट आपले विचार लोकां मेरेन सामकेच उण्या उतरांनी आनी उण्या वेळान पावोवपाचें काम करता, देखूनच संवसारांतल्या दरेका सेलिब्रिटीचें ट्विटराचेर खातें आसता. फेसबुकाचेर सगलेच लोक आसतात. मात ट्विटराचेर सामके हायफाय लोक आपले विचार लोकां मेरेन पावयतात. कांय सेलिब्रिटींचे ट्विटराचेर लाखांनी फॉलोअर्स आसात. तांणी कितेंय ट्वीट केलें जाल्यार एका मिनटाक लाखांनी लोक तें लायक करतात, रिट्वीट करतात. ह्या फॉलोअर्सां कडेन खिणा भितर पावपा खातीर सेलिब्रिटी ट्विटराचेर आदारून आसतात.
हेर सोशल मिडिया प्रमाण ट्विटराचेरय बनावट सेलिब्रिटी खातींय आसात, पूण सेलिब्रिटींच्या खात्या मुखार ब्ल्यू टिक घालतकच तें खातें तांचें अधिकृत खातें हाची वळख पट्टा. ब्ल्यू टिक आशिल्लें खातें त्या सेलिब्रिटीचें अधिकृत खातें आसता, पूण ट्विटरान आतां जायत्या सेलिब्रिटींचो तोच ब्ल्यूक काडून उडयला. देखून जायत्या सेलिब्रिटींनी नाराजी उक्तायल्या. मात ट्विटराचे सीईओ एलान मस्क ठाम आसात. तांणी स्पश्ट केलां की ब्ल्यू टिक खातीर जो मेरेन म्हयन्याक 8 डॉलर भाडें म्हणजे 665. 77 रुपया दिले नात जाल्यार तांकां ब्ल्यू टिक मेळचो ना.
ट्विटरान ब्ल्यू टिक काडून उडयल्ल्या सेलिब्रिटीं मदीं उत्तर प्रदेशाचे मुख्यमंत्री योगी आदित्यनाथ, उद्देजक रतन टाटा, क्रिकेट खेळगडो विराट कोहली, फिल्म अभिनेते अमिताभ बच्चन, शाहरुख खान, सलमान खान, प्रियंका चोपडा, रजनीकांत, ऋतिक रोशन आनी हेर हजारांनी कलाकार आसात. हे व्हडले सेलिब्रिटी. एलान मस्कान ट्विटर घेतलो तेन्ना तांणी सांगिल्लें की सेलिब्रिटींक ब्ल्यू टिक खातीर म्हयन्याळी फी भरची पडटली, पूण सेलिब्रिटींनी सदचे भशेन ताचे कडेन दुर्लक्ष केलें. एलान मस्क हो एक कट्टर वेवसायीक आनी आपलो वेवसाय चलयतना ते कसलीच दया दाखयनात आनी तांणी ती दाखोवंकूय ना. आपल्या नेटवर्किंग साइटीचे वापरपी (युजर्स) कोणूय आसूं, ते फिल्म उद्देगांतले आसूं वा राजकारणांतले, खेळगडे आसूं वा वेवसायीक, ताका कसलोच फरक पडना. आपल्या वेवसायांत तो कोणा कडेन चड लक्षूय दिना. सेलिब्रिटी जाल्ल्यान फुकट वा सेवांचेर सवलत दिना. सेलिब्रिटींचे फकत आमच्या देशांत लाड करतात. आतां आमच्या देशांतय सेलिब्रिटींचे लाड बंद करपाक जाय. सामान्य नागरिकां खातीर जे नेम आसात तेच सेलिब्रिटीं खातीर आसपाक जाय. फकत सेलिब्रिटी आशिल्ल्यान तांकां नेमांतल्यान सुट दिवंक फावना. कायद्या मुखार सगळेच सारके आसात, फकत कागदाचेर न्हय तर वास्तवांत. तशें पळोवंक गेल्यार अॅलोन मस्क हांणी आमकां हो आदर्श घालून दिला. आमी नाका तांकां हिस्पा भायर म्हत्व दितात. हातूंत फक्त सेलेब्रिटीची चूक ना, तर आमची समाजाचीय चूक आसा. उंचेल्या पांवड्याचेर कलाकार, खेळगडेच न्हय, तर आमी अक्षरशा कोणाकूय म्हत्व दितात. मात मस्कान वेवसायांत सगले एक समान हो आदर्श घालून दिला. तशे पळोवंक गेल्यार कलाकार, राजकी फुडारी, खेळगड्यांक म्हयन्याक 665 रुपया म्हणल्यार किस झाड की पत्ती.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
