ट्रेन बेगीन सुरू जावची

भांगरभूंय | प्रतिनिधी

रेल्वे क्रोसिंगाचेर जे कितें त्रास जातात ते त्या रस्त्यान वतल्याकूच कळटात. सालसेतींत दवर्ले आनी नेसाय ह्या दोनूय वाठारांनी रेल्वे गेट लागता. आतां हांगा ट्रेकाचें दुपदरीकरण केलां. हांगा मात्शी नदर मारून पळोवपाची. खंयच्याय वेळार ट्रेन वा गुडस येता आनी अर्द अर्दवर ह्या गेटींचेर रांको आसतात.

हालींच गोंयचे राज्यसभा खासदार सदानंद शेट तानावडे हांणी गोंयच्यान सोलापूर ट्रेन सुरू करपाची मागणी केली. जायते गोंयकार पंढरपूर, तुळजापूर, अक्कलकोट तशेंच गाणगापूर देवदर्शनाक वतात. सोलापूर हें मध्यवर्ती ठिकाण. गोंय-सोलापूर ट्रेन जाली तर देवदर्शनांक वचपी गोंयकारांक ती फायद्याची थारतली. हीं सगळीं तीर्थ क्षेत्रां सोलापूर सावन पंचवीस ते तीस किलोमिटर अंतराचेर आसात. हाचो गोंयकारांक तशेंच हेर राज्यांतल्या लोकांकूय फायदोच जातलो. एका म्हत्वाच्या विशयाक चालना दिल्ले खातीर तानावडे तोखणायेक पात्र थारतात. फक्त तांणी मागणी करून रावनासतना फाटीक लागून ती पूर्ण जातली म्हणपाचें पळोवचें.
तशी गोंयकारांक आनीक एका ट्रेनीची गरज आसा. गोंयच्यान जायते लोक पुण्याक वतात. कांय लोक कामाक वतात तर कांय जाण उपचारा खातीर वतात. जायते भुरगे शिकूंक पुण्याक आसात. तशेंच शिर्डी वचपी गोंयकार उणे नात. म्हणटकूच गोंयच्यान शिर्डी ट्रेन सुरू केल्यार मीरज, सांगली, कोल्हापूर, पुणें वचपी गोंयकारांक ताचो फायदो मेळूंक शकता. हे खातीर तश्यो नव्यो ट्रेनी सुरू करपाची गरज ना. आसा त्योच परतून सुरू केल्यार पुरो. वास्कोच्यान मुंबय वचपी दोन ट्रेनी रुळांचें ब्रॉड गेजींत रुपांतर करता म्हणून बंद केल्ल्यो त्यो ब्रॉड गेज जाले उपरांतूय सुरू जावंक नात आनी कोणे तांची वासपूसय केल्ली ना. आमचे फाटले खासदार मौनिबाबा जावन रावले आनी रिटायर जाले. कांय जाणांनी तर वेंचणुके वेळार रुळार बसून आंदोलनूय केल्लें. पूण उपरांत बाबड्यांक ताचो उगडासूच उरलो ना आनी ट्रेनी सुरू करप तांकां शक्य जालें ना. आतां खासदार तानावडेन सोलापूर ट्रेनीची मागणी करूंक तोंड उगडलांच म्हणटकूच ह्या रेल्वेंचेरूय तांणी लक्ष दिवचें.
गोंय, कर्नाटक आनी महाराष्ट्र अश्या तीन राज्यांतल्यान ह्यो ट्रेनी वताल्यो. गोंयच्या खूबशा लोकांक हाचो उपेग जातालो. गोंयचे खूबशे लोक दोतोर आनी हॉस्पिटल सोदूंक बेळगांव, घटप्रभा, मिरज ह्या वाठारांनी वतात. कांय दुयेंसांचेर ह्या वाठारांनी बरो इलाज जाता. ट्रेन सुरू जाल्ली जाल्यार खूबशा दुयेंतींक ती बरी पडपाची. पूण हाचेर कोण लक्ष दिनात. लोकप्रतिनीधी दुबळे आसले म्हणजे असलीच परिस्थिती येवपाची. पूण सद्याक तानावडे सारको गोंयकारांच्या विशयांचेर तोंड उगडपी खासदार आमकां लाभला. तांणी हांगा लक्ष घालचें. ह्यो ट्रेनी सुरू जाल्यार गोंयकार तांची सदांच याद दवरतले हातूंत दुबाव ना.
दक्षीण गोंयच्या खासदारान खरें म्हणल्यार हातूंत लक्ष घालूंक जाय आसलें. पूण ह्यो ट्रेनी कितल्यो गरजेच्यो हाची तांकां जाण आसा काय ना कळना. आशिल्ली जाल्यार ते ताचेर कितें तरी उलोवपाचे. तशें ह्या लोकप्रतिनिधींनी केन्नाय रेल्वे वता त्या वाठारांचेरूय नदर मारूंक जाय. कुमारजुंवेंच्या आमदारान लोकांक जाता ते त्रास पळोवन आनी तांची गरज लक्षांत घेवन गवंडाळे उड्डाण पूल बांदूक घेतलो. रेल्वे क्रोसिंगाचेर जे कितें त्रास जातात ते त्या रस्त्यान वतल्याकूच कळटात. सालसेतींत दवर्ले आनी नेसाय ह्या दोनूय वाठारांनी रेल्वे गेट लागता. आतां हांगा ट्रेकाचें दुपदरीकरण केलां. हांगा मात्शी नदर मारून पळोवपाची. खंयच्याय वेळार ट्रेन वा गुडस येता आनी अर्द अर्दवर ह्या गेटींचेर रांको आसतात. केन्ना गेट उगडटली आनी केन्ना आमी कामाक वा घरा पावतले. तशी ह्या गेटींचेर दिसभरूय रांक आसता पूण सकाळीं शाळांचो वेळ आनी दनपारचो शाळा सुट्टकूच भुरग्यांचो घरा वचपाचो वेळ. ह्या वेळार गेट बंद जातकूच कितें जातलें तें पळेयात. बाबडीं उपाशीं भुरगीं दनपारच्या कडार अर्द-पावूण वर थंय ताटकळटात. खंयच्याय लोकप्रतिनिधींचे नदरेक कशें येना हें? आनी दुसरे कडल्यान वतले म्हणल्यार दुसरी वाटूय ना.
हांगच्या आमदार-खासदाराक हें कशें दिसना काय? हांगा एकादो ओव्हरब्रीज जावचो हे खातीर ते कित्याक यत्न करिनात? दवर्लेची सर्वे जावन एस्टीमेट सरकाराक धाडल्यार पंदरा वर्सां जालीं. भौशीक बांदकाम खात्यांतल्यान जाणे कोणे हें काम केल्लें तो रिटायर जावन पांच वर्सां जालीं. कित्याक जायनात हीं कामां? राजेश फळदेसायाक जें जमता तें हेरांक कित्याक जमचें न्ही? आनी आमकां डबल ट्रेक नाका, लागीं स्टेशन नाका, हें नाका आनी तें नाका करतल्यांक आमकां हांगा वाट जाय. गेट नाका ओव्हरब्रीज वा सब व्हे जाय हें सांगूंक कशें जमना काय? फक्त नाका नाका म्हणपाचीच संवय आशिल्ल्यांनी रेल्वे गेट नाका इतली तरी मागणी करपाची.
सद्याक रेल्वेचेर जायतो खर्च सरकार करता. स्टेशनाचो कायापालट, सोबीतकरण हाचेर कोट्यांनी रुपया खर्च जाता. रेल्वेन आतां नवी कात धरल्या म्हणल्यार अतिताय जावची ना. पूण हें सगळें करतनाच रेल्वे गेटी काडून उडोवप आनी अश्या जाग्यांचेर ओव्हरब्रीज बांदप हेंवूय जावंक जाय. बाकी कोण लक्षांत घेतले म्हणपाचो दुबाव पूण एकाच मनशाकडल्यान आशा दवरूं येता आनी तो म्हणल्यार खासदार तानावडे. तांणी नेसायचे रेल्वे गेटीचेर लक्ष घालून दर दिसा लोकांक आनी चड करून स्कुलांच्या भुरग्यांक जावपी त्रासाचेर उपाय काडचो आनी तांचेर उपकार करचे. हय आनी परत एकदां विनंती: एका काळार सावथ सेंट्रल रुटान वास्को-मुंबय वचपी आनी ब्रॉड गेजीच्या निमतान बंद जाल्ल्या ट्रेनींक तुमच्याच कार्यकाळांत पाचवो बावटो दिसचो.

अभयकुमार वेलींगकार
9423884687