भांगरभूंय | प्रतिनिधी
मुंबय, खबरां संस्था: दर दिसा लाखांनी लोक रेल्वेन भोंवतात. तांकां हो प्रवास सोंपो करपा खातीर रेल्वे यत्न करीत आसा. जेवणा पसून पेय ते बसपा मेरेनच्या प्रवासांत कसलोय त्रास जाल्यार रेल्वेन हेल्पलायन क्रमांक जारी केल्यात. हाका लागून प्रस्न बेगीन सुट्टा. रेल्वे प्रवासांत बायलांची सुरक्षीतताय हो खूब म्हत्वाचो विशय. देखून भारतीय रेल्वेन बायल प्रवाशांचे सुरक्षितताये खातीर म्हत्वाचे निर्णय घेता.
बायलांचो प्रवास सुटसुटीत जावचो हे खातीर रेल्वेन खाशेली वेवस्था केल्या. रेल्वेंतल्यान भोंवतना बायलांक खंयचे खाशेले हक्क मेळटात? हें जायत्या जाणांक खबर ना. ताचे विशीं जाणून घेवया.
रेल्वेन मेल/एक्सप्रेस गाडयांनी बायलां खातीर वेगळो विभाग राखून दवरला. तशेंच उपनगरांतल्या गाडयांनी १५० किमी अंतराचेर राखीव डबे दवरल्यात. जायत्या बायलांक हे विशीं खबर ना.
रेल्वे प्रवासांत वैध तिकीट नाशिल्ल्या प्रवाशांक जायते फावट रेल्वेंतल्यान देंवयतात. पूण बायलांचें अशें ना. रातच्या वेळार एकट्यान प्रवास करपी बायले कडेन वैध रेल्वे तिकेट नासली तरी रेल्वे कर्मचार्यांक तिका गाडयेंतल्यान देंवोवंक मेळना. रेल्वेन बायलांची सुरक्षीतताय मतींत दवरून हो नेम केला.
बायलांचे खाशेले सुरक्षितताये खातीर रेल्वे सेगीत यत्न करीत आसता. त्या नेमांत गरज पडल्यार म्हत्वाचे बदल करतात. तेच प्रमाण राखीव डब्यांतल्यान एकटी प्रवास करपी बायलांची चवकशी करतात. हे खातीर प्रवासांत बायलां सुरक्षा कर्मचार्यांचीय नेमणूक करतात. रेल्वे स्टेशनांचेर रेल्वेक कळाव जाल्यार वा रेल्वे स्टेशनाचेर कांय वेळ घालोवपा खातीर वेगवेगळीं वेटिंग लावंजांची वेवस्था करतात. रातच्या वेळार एकटी भोंवपी बायलांक असुरक्षितताय दिसची न्हय म्हणून अश्यो जायत्यो वेवस्था केल्ल्यो पळोवपाक मेळटा.
एक बायल गाडयेंत एकटीच प्रवास करता आनी मेळिल्ली सीट तिका कन्फर्टेबल दिसना जाल्यार ती हे संबंदी टीटीई कडेन म्हायती दिवंक शकता. टीटीई बायलेक ती बदलपाक आदार करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
