भांगरभूंय | प्रतिनिधी
भांगरभूंय । प्रतिनिधी
वास्कोः भारतीय जिम्नॅस्टिक फेडरेशनान डोंबिवली- मुंबय हांका आयोजीत केल्ले ट्रॅम्पोलिन आनी टंबलिंग जिम्नॅस्टिक्स राष्ट्रीय सर्तींत गोंयच्या प्रत्युष उपाध्येक कांस्या पदक तशेंच गोंयच्या पंगडाक कांस्या पदक फावो जालें.
ट्रॅम्पोलिन जिम्नॅस्टिकच्या सब-ज्युनियर पंगडांत उपाध्यायान हें पदक मेळयलें. महाराष्ट्राच्या देव गुप्ता आनी सई शिर्के हांका भांगरा आनी रुप्या पदक फावो जालें.
ट्रॅम्पोलिन जिम्नॅस्टिकच्या सिनियर पंगडांत अभिजित निंबाळकरान कांस्या पदक मेळयलें. भांगरा आनी रुप्या पदक महाराष्ट्राच्या आदर्श भोईर आनी सेवा मंडळाच्या उदित चव्हाण हांणी मेळयलें. वडोदरा-गुजरात हांगा 2022 वर्सा जाल्ले राष्ट्रीय खेळां सर्तींत अभिजित निंबाळकराक कांस्या पदक मेळल्लें. सोफिया, बल्गेरिया हांगा जाल्ले वर्ल्ड चॅम्पियनशीप खातीर ताचो आसपाव भारतीय पंगडांत केल्लो.
ट्रॅम्पोलिन जिम्नॅस्टिकच्या सिनियर पंगडांत गोंय पंगडान 202.40 गुणांनी सांघीक सर्तींत कास्यां पदक मेळयले. गोंय पंगडांत अभिजित निंबाळकर, सुबोदीप नंदी, सुदिप्ता सरदार आनी मेनक दत्ता हांचो आसपाव आशिल्लो. टंबलिंग जिम्नॅस्टिकच्या सिनियर पंगडांत गोंय पंगडान 85.20 आनी 93.00 गुणांनी भांगर आनी रुप्या पदकां जिखली. गोंयच्या पंगडांत सौहित सिन्हा, सुदिन भुईमाली आनी अनिश गायन हांचो आसपाव आशिल्लो. गोंय जिमनॅस्टिक असोसिएशनाच्या सगल्या वांगड्यांनी गोंय पंगडांतल्या खेळगड्यांक परबीं भेटयल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.