भांगरभूंय | प्रतिनिधी
नवी दिल्ली, खबरां संस्था ः देशभरांत अपघाताचे प्रमाण बरेच वाडलां. तेच बरोबर ल्हानशां गोंय राज्यांत अपघातांचो आंकडो नेटान वाडत आसा. तशेंच तांतूत मरण येवप्यांचो आंकडो वाडत आसा.
रस्तो आनी येरादारी मंत्रालयाच्या 2022 वर्साच्या रस्तो अपघाताच्या आंकडेवारी प्रमाण भारतांत दर दिसा 1263 रस्त्याच्या अपघातांत 462 लोकांक मरण येता. जायत्या प्रकरणांनी वाहन चालकांच्या निश्काळजीपणाक लागून वा लोकां मदीं रस्त्याचे सुरक्षे विशीं जागृताय नाशिल्ल्यान अपघात घडटात. भारतांत येरादारी नियंत्रणांत ट्रॅफिक सिग्नलांचो म्हत्वाचो वांटो आसा. खास करून शारांनी जंय वाहनांचो आनी लोकांचो आंकडो चड आसा.
चडशा लोकांक सिग्नल लाइट, यू-टर्न, वन लेन अशा सामान्य येरादारी चिन्नांची वळख आसा. पूण येरादारीचीं जायतीं चिन्नां आसात जांची लोकांक अजून म्हायती ना.
येरादारी नेमाचें उल्लंघन करपा विशीं रस्तो येरादारी आनी म्हामार्ग मंत्रालयाच्या आंकडेवारी प्रमाण ‘ओव्हर स्पीडींग’ हें रस्त्या अपघाताचें सगळ्यांत व्हडलें कारण आसा. जाल्यार दुसरे म्हळ्यार लोकां मदीं ट्रॅफिक सिग्नल्स विशीं फावो ती म्हायती नाशिल्ल्यान अपघात जातात आनी हजारो लोक अपघातांत मरतात. 2022 वर्सा येरादारी नेमाचें उल्लंघन जाल्ल्यान 1.5 लाखां परस चड रस्ते अपघात जाल्यात.
येरादारी नेमांचे उल्लघंन केल्ल्यान दरवर्सा 60 हजार मरण
| कारण | अपघात | मरण |
| हाय स्पिड | 1,10,027 | 45,928 |
| चुकीचें लेनीत गाडी चलोवप | 7,330 | 3544 |
| सोरो पियेवन गाडी चलोवप | 3,268 | 1503 |
| गाडी चलतना नोबायल वापरप | 2,479 | 1132 |
| तांबडी लायट हुपप | 707 | 271 |
| हेर कारणा | 28,186 | 8660 |
| वट्ट | 1,51,997 | 61,038 |
नव्या मोटार वाहन कायद्या प्रमाण येरादारी नेम मोडल्यार खर ख्यास्त दिवपाची तरतूद आसा. देखून सगळे ट्रॅफिक सिग्नल जाणून घेवप आनी तांकां पाळो दिवप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
