भांगरभूंय | प्रतिनिधी
अमेरिकेचे राष्ट्राध्यक्ष डोनाल्ड ट्रम्प सत्तेर येवन अशे तशे तीन म्हयने जाले आसतले. ह्या तीन म्हयन्या भितर अमेरिकन लोक ट्रम्पाचेर बेजारिल्ल्याचें दिसून येता. ज्या अमेरिकेंतल्या लोकांनी तीन म्हयन्यां पयलीं डोनाल्ड ट्रम्पाक व्हड प्रमाणांत मतां दिवन राष्ट्राध्यक्ष केलो. तेच अमेरिकेचे लोक आतां तांचे आड रस्त्यार देंवून आंदोलन करीत आसात. विशेश म्हणल्यार हीं आंदोलनां फक्त एका शारांत वा राज्यांत जायनात. जाल्यार अमेरिकेंतलीं सगलीं राज्यां म्हणल्यार 50 राज्यांतल्या 1200 शारांनी जायत आसात, आनी तातूंत लाखांनी अमेरिकन लोक वांटेकार जायत आसात. आंदोलकांनी ह्या आंदोलनाक ‘हॅण्डस ऑफ’ आंदोलन अशें नांव दिलां. हें आंदोलन लोकशाये खातीर आशिल्ल्याचें सांगतात. ह्या आंदोलनांत अमेरिकेंतल्या देडशे परस चड गटांनी वांटो घेतला. तातूंत समाजीक संघटणा, कामगार संघटणा, एलजीबिटीक्यू प्लस समर्थक गट, समाजीक आनी लोकशायवादी गटांचो आस्पाव आसा.
डोनाल्ड ट्रम्प हांचे आडचे हें आंदोलन शांततायेच्या मार्गान चालू आशिल्ल्यान कोणाकूच अटक केल्ली ना. पूण ह्या आंदोलनाक लागून अमेरिका आनी डोनाल्ड ट्रम्प हांची संवसारभर अप्रतिश्ठा जाली हें मात खरें. आंदोलकांनी फक्त डोनाल्ड ट्रम्प हांचेच आड न्हय जाल्यार तांचे सहाय्यक लन मस्क हांचे आडूय घोशणा दिल्यात. तीन म्हयन्यां पयलीं ज्या डोनाल्ड ट्रम्पाक लोकांनी सत्तेर बसयलो तांचेच आड लोक रस्त्यार कित्याक देंवतात असो प्रस्न विचारतात. ताची जाप म्हणल्यार ट्रम्प हांचो एककल्ली आनी मनमानी कारभार. राष्ट्राध्यक्षपदाचो सोपूत घेत सावन डोनाल्ड ट्रम्प हांणी एका फाटोफाट एक अशे निर्णय घेत रावले. पूण हे निर्णय घेतना तांणी खूबशा जाणांक दुखयलें. डोनाल्ड ट्रम्प हांणी हेर देशांतल्यान आयात जावपी म्हालांचेर सुमारा भायर कर लायलो. हें करतना तांणी अमेरिकेकूच हाचो फायदो जातलो अशें सांगलें.
डोनाल्ड ट्रम्प हांच्या ह्या निर्णयाक मेक्सिको, चीन, भारत, कॅनडा ह्या देशांनीय जशाक तशी जाप दिवन अमेरिकेंतल्यान आयात जावपी म्हालांचेर तितलोच अतिरिक्त कर लायलाे. ताका लागून संवसारांत वेपार झुजाक तोंड फुटलां. हाचो परिणाम जितलो संवसाराचेर जातलो तितलोच तो अमेरिकेचेर लेगीत जातलो. ह्या वेपार झुजाक लागून अमेरिकन बाजारपेठेंत मंदी येवपाची भिरांत थंयचे तज्ञ उक्तायतात. जर अमेरिकेंत मंदी आयली जाल्यार अमेरिकेंत म्हारगाय वाडटली. ताचो फटको थंयच्या सर्वसामान्य लोकांक बसतलो. ताका लागून डोनाल्ड ट्रम्प हांचो हो निर्णय थंयच्या सर्वसामान्य लोकांक पटिल्लो ना. फक्त हो एकसुरो निर्णय न्हय जाल्यार फाटल्या कांय दिसांनी ट्रम्प हांणी घेतिल्ले खूबशे निर्णय लोकांक आवडिल्ले नात. तातूंत हजारांनी केंद्रीय कर्मचाऱ्यांची कपात, समाजीक सुरक्षा वेवस्थापन कचेऱ्यो बंद करप, मजत एजेंसी बंद करप, स्थलांतरितांक हद्दपार करप, तृतीय पंथियांच्या कामाच्यो संदी उण्यो करप, भलायकी कार्यावळींचो निधी उणो करप हे आनी हाचे सारके खूबशे निर्णय अमेरिकेंतल्या लोकांक पटिल्ले नात. ह्या निर्णयांक विरोध करपा खातीरच अमेरिकेंतले लोक रस्त्यार देंवल्यात.
डोनल्ड ट्रम्प हांणी अमेरिकेच्या राष्ट्रपतीपदाची सुत्रां हातांत घेतली तेन्ना सगल्यांत पयली जो आदेश जारी केल्लो तो देशाच्या दक्षीण शिमेर राष्ट्रीय आणिबाणी लागू करपा कडेन जोडिल्लो. ट्रम्प हांणी तांच्या आदेशांत 90 दिसां उपरांत 1807 चो बंडखोरी कायदो (Insurrection Act) वापरूं शकता अशें म्हणिल्लें. आतां 20 एप्रील उपरांत अमेरिकेंत सैन्य तैनात जावपाच्यो हालचाली सुरू जाल्यात. ते खातीर अमेरिकेंत हुस्को वाडला. घुसखोरी आडावपा खातीर डोनाल्ड ट्रम्प सैन्याचो वापर करूंक शकतात अशें लोकांक दिसता. 1807 चो बंडखोर कायदो असो आसा जो अमेरिकेच्या राष्ट्राध्यक्षाक विशेश परिस्थितींत सैन्य आनी नॅशनल गार्ड तैनात करपाची परवानगी दिता. जर देशांत कोणूय बंडखोरी, दंगल, हिंसाचार वा कायद्याचें उल्लंघन करता आसत जाल्यार ह्या कायद्या प्रमाण राष्ट्राध्यक्ष सैन्य धाडूंक शकता. सद्या अमेरिकेंतले लोक ट्रम्प हांच्या धोरणांचो निशेध करपा खातीर रस्त्यार देंवल्यात. ताका लागून हाचेरूय सैन्याची कारवाय जावंक शकता.
लोकांची वाडटी तिडक उणी करपा खातीर व्हायट हावस मुखार आयल्या. पूण ताचो आंदोलकांचेर कसलोच परिणाम जातना दिसून येना. आंदोलनाची धग वाडतच चल्ल्या. एककल्ली, मनमानी कारभार करीत जाल्यार लोक ती खपोवन घेनात हेंच ह्या आंदोलनांतल्यान अमेरिकेन लोकांनी दाखोवन दिलां. हें आंदोलन जर अशेंच चालू उरलें जाल्यार डोनाल्ड ट्रम्प हांकां लोकां मुखार नमतें घेवचेंच पडटलें आनी आपल्या एककल्ली सभावाक आळो घालून लोकांच्या हिताचे अशे सर्वसमावेशक निर्णय घेवचे पडटले.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
