भांगरभूंय | प्रतिनिधी
वॉशिंग्टन, खबरां संस्था: अमेरिकेचे अध्यक्ष डोनाल्ड ट्रम्प हे आयज संसदेच्या जोड सत्राक पयलेच फावट उलयले. अमेरिकन जनतेक सुख दिवपी खुबशे निर्णय ट्रम्प हांणी आयज जाहीर केले. दुसरे वटेन तांणी मेक्सिको, चीन, ब्राझील, दक्षीण कोरिया, युक्रेन आनी भारत ह्या देशांक धक्को दिलो. ट्रम्प हांणी वट्ट १ वर ३० मिनिटांचें भाशण केलें. ह्या भाशणा मजगतीं तांणी दोन फावटी भारताचो उल्लेख केलो. अपेक्षे प्रमाण तांणी आयात शुल्काच्या मुद्द्यावेल्यान भारतावेलो राग उक्तायलो. तांणी म्हणलें, भारत अमेरिकेचेर १०० टक्के आयात शुल्क (टॅरिफ) लादता. हो योग्य निर्णय न्हय. आमीय येवपी २ एप्रील सावन तांकां आयात शुल्क दितले. ह्या न फुडें जो देश आमचेर आयात शुल्क लादतलो तांचेर तितलोच चड आयात शुल्क लादतले, अशें तांणी म्हणलें.
मजगतीं, अमेरिकेचे राष्ट्राध्यक्ष ट्रम्प हांच्या जशाक तसो कर ह्या धोरणाक नेटान प्रत्युत्तर मेळटा. चीन आनी कॅनडानूय टॅरीफ (वेपार कर) आकारपाची घोशणा केली. ह्या संवसारीक वेपार युद्धाचो भारताक लाव जावपाची शक्यताय आसा. पयल्या तीन म्हयन्यांत भारतांतल्यान जावपी निर्यातींतल्यान अमेरिकेक जावपी निर्यातींत १०% मेरेन वाड जावपाक शकता, असो तज्ज्ञांचो अदमास आसा. भारतांतल्यान वट्ट ८.४० लाख कोटी रुपयांच्या मालाची निर्यात जावपाक शकता. सध्या भारताची अमेरिकेक ७.६३ लाख कोटींची निर्यात जाता आनी ३.६५ लाख कोटींची आयात करता. वेपाराचो हो लंबक भारता वटेन बागवता. भारतीय निर्यातदारांची वेपार वाडपा खातीर मजत मेळटली. ट्रम्प हांणी पयले कार्यावळींत चिनी मालाचेर अतिरिक्त कर घातले उपरांत सगळ्यांत चड फायदो जाल्लो भारत हो चवथो देश आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
