भांगरभूंय | प्रतिनिधी
वॉशिंगटन, खबरां संस्था: अमेरिकेचे नियोजीत अध्यक्ष डोनाल्ड ट्रम्प हांची सोमारा थळाव्या वेळा प्रमाण दनपरां १२ वरांचेर आनी भारतीय वेळा प्रमाण सोमारा रातीं १०.३० वरांचेर अध्यक्षपदाची सोपूत विधी जावपाची आसा. ह्या समारंभा खातीर ते आयतारा वॉशिंग्टनाक आयले.
मजगतीं, ट्रम्पचे सोपूत विधी निमतान भारताचे गिरेस्त मनीस मुकेश अंबानी आनी तांची बायल नीता अंबानी हांणी अमेरिकेंत वचून तांची भेट घेवन परबीं भेटयलीं.
ट्रम्प हांणी आपली अध्यक्षपदाची दुसरी कारकिर्द सुरू करचे पयलीं कुटुंबीय, समर्थक आनी राजकीय इश्टां सयत सुवाळो मनयलो. चार वर्सां पयलीं जो बायडेन हांचे कडेन सत्ता सोपोवन ते भायर सरिल्ले. वॉशिंग्टन पसून लागींच आशिल्ल्या व्हर्जिनिया हांगा ‘ट्रम्प नॅशनल गोल्फ क्लब’ हांगा ट्रम्प हांच्या येवकारा निमतान फोग लायलो. वॉशिंग्टनांतलें तापमान बरेंच थंड आशिल्ल्यान उक्तावणाची पुराय कार्यावळ सभाघरात जावपाची शक्यताय आसा. अध्यक्ष आनी उपाध्यक्षांचो सोपूत विधी परंपरे प्रमाण कॉंग्रेसच्या सोंपणाचेर जाता. अंदूं मात तातूंत बदल जावपाची शक्यताय आसा. अशी परिस्थिती ४० वर्सां पयली, १९८५ त जाल्ली. तेन्ना अध्यक्ष रोनाल्ड रेगन हांणी दुसर्या अध्यक्षपदाचो सोपूत भायर घेनासतना कॉंग्रेस सभाघरांत घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
