भांगरभूंय | प्रतिनिधी
देश मुखार व्हरपाक सगल्यांक वांगडा घेवन वचपी नितळ मनाचो फुडारी जाय. लोकांक बरे दीस येतले, दीसपट्ट्या संकश्टां पसून तांकां थाकाय मेळटली, हे खातीर ताचे यत्न जाय. ‘रोटी, कपडा और मकान’ इतलें पसून मेळ्ळ्यार लोक खोशी जातात. आपलो देश सगले नदरेन वयर काडपाक फुडाऱ्यान दुरदिश्टीन येवजण्यो आंखपाक जाय, जांचो फक्त देशाक, देशवासियांक फायदो जातलो!! अमेरिकेचे नवे अध्यक्ष डोनाल्ड ट्रम्प हेवूय ते नदरेन पावलां उखलपाक लागल्यात. ताचो तांच्या देशाक लाव जाता तेन्ना जाता, पूण सध्या हेर देशांक लुकसाण जातलें. संघर्श वाडटलो, कोडसाण, दुस्वासाक सारें- उदक मेळटलें, अशें दिसता. कुटुंब मुखेल्यान सगल्यांक सांबाळपाचें आसता, पूण हांगा संवसाराची महासत्ता आशिल्ली अमेरिका हेर देशांक मनस्ताप जातलो, अशे तरेन वागपाक लागल्या. तें ताकाय माल वचूं येता. आयच्यान अमेरिकेन हेर देशांचे निर्गतीचे परस्पर शुल्क घेवपाचो निर्णय घेतला. हो निर्णय 13 फेब्रुवारीक जाहीर जाल्लो. अमेरिकन प्रसारमाध्यमांनी ताका टिट फाॅर टेट टॅक्स (कसलेय घडणुकेचो सूड घेवन ताका बुद्द शिकोवप) अशें नांव दिलां. अमेरिका हेर देशांक निर्गत करता, ताचेर कर फारीक करचो पडटा, म्हणटकच आमच्या देशांत ते धाडटात, ताचेर चड शुल्क दिवचें पडटलें, अशें भारताचे ‘फ्रॅण्ड’ ट्रम्प हांणी म्हणलां. हें सांगतनाच तांणी भारतान अमेरिकेच्या उत्पादना वयल्या शुल्कांत व्हडली कपात करपाचो निर्णय घेतला, अशेंय स्पश्ट केलां. भारतान मात तें न्हयकारलां.
ट्रम्प हांणी म्हणलां, बरेच देश अमेरिके वांगडा चुकीचे वागल्यात. तांकां तें खबर आसा, ते तांचें शुल्क उणे करतले. भारत पसून तें उणें करतलो. जाणकारांच्या मतान, आमचे खातीर हो क्रूर म्हयनो आसतलो. आमकां अर्थीक नदरेन त्रास जावं येतात. दोनूय देशां मदलो वेपारी तणाव सोंपोवपाचो यत्न भारत करतना अमेरिकेन हें ट्रम्प कार्ड खेळ्ळां. भारत कांय वस्तूंचेर 100 टक्के शुल्क घेता. खंयचोय देश जितलो कर आमचे कडल्यान घेतले, तितलो आमी तांचेर घालतले. जर तांणी आमकां तांच्या बाजारांत सवती वागणूक दिल्यार आमीय तांकां आमचे बाजारपेठेंतल्यान कुशीक दवरतले, अशें ट्रम्प हांणी जाहीर सांगिल्लें. हाचो भारताच्या वाहन आनी शेतकी उद्देग मळाक चड धपको बसतलो. सिटी रिसर्चच्या मतान, वर्साक 7 अब्ज डाॅलरांचें लुकसाण जावं येता. ‘आपणा कडेन शुल्का संबंदी कोण वाद घालपाक शकना’ अशेंय तांणी म्हणिल्लें. ही ट्रम्पगिरी खंयचे देश सोंसून घेतात, तें आतां पळोवपाचें.
अमेरिकेच्या परस्पर शुल्काच्या निर्णया आड चीन, जपान आनी दक्षीण कोरिया एकठांय आयल्यात. ह्या तीन देशांनी एकमेकांच्या वेपाराक उर्बा दिवपाचो निर्णय घेतला. पांच वर्सां उपरांत तांच्या वेपार मंत्र्यांनी भासाभास केली. आमचे मदीं मुक्त वेपार कबलात जावं येता, अशें तांणी म्हणलां. तंत्रज्ञानाचे बाबतींत हे तिनूय देश संवसारांत आघाडेचेर आसात. चीन तर दरेका देशांत घुसला. येवपी दिसांनी हेर कांय देशूय चीन, जपान, द. कोरियाक येवन मेळ्ळे जाल्यार अजाप न्हय. भारतान कर उणे करपाचे कसलेंच आस्वासन दिवंक ना, अशें आमच्या वाणिज्य सचिवान तीन सप्तकां पयलीं सांगिल्लें. दुसरे वटेन अमेरिका म्हणटा, लागीं- लागीं सगल्याच देशांनी अमेरिकेक अर्थीक आनी वेपारी नदरेन लुटल्या. आतां खंय हें पुरायेन बंद जातलें. भारत खूब शुल्क घेता. पूण आतां तो तें उणें करतलो. कारण आमी तांचीं ‘गैरकृत्यां’ उक्तडार हाडल्यांत, अशें इश्ट ट्रम्प हांणी 7 मार्चाक म्हणिल्लें. अमेरिका आमच्या देशाक गुदांव समजता कितें? तांणी कितेंय हाडून हांगा रकोवचें? सगलेच देश आपल्या देशांत येवपी म्हालाचेर शुल्क घेतात. भारत- अमेरिका 2030 मेरेन 500 अब्ज डाॅलर वेपार करपाक पळयता. दुचाकीचेर भारतान शुल्क 50 टक्क्यां वयल्यान 30 टक्क्यांचेर हाडलां. व्हिस्कीचेर ड्युटी देंवयल्या. संरक्षण साधनां घेवपाचें उतर दिलां. अजून जायत्या वस्तूं वयले शुल्क उणें करपाची तयारी दाखयल्या. तरीय अमेरिका आमकां आपल्या तालाचेर नाचोवपाक सोदता. विदेशी म्हाला फाटल्यान पिशे जावप्यांनी हें मतींत घेवचें.
एखादे कंपनीन अमेरिकेंत जर आपलें उत्पादन तयार करूंक ना जाल्यार तिका शुल्क भरचें पडटलें. तें चड आसूं शकता. हेर देश आमचेर विवीध करांचें वजें घालतात. आमी मात खूबच उणें शुल्क घेतात, अशें इश्ट ट्रम्प म्हणटात. अमेरिकेचें यूग परत आयलां. खंयच्याच सरकारान करूंक ना, अशें बरें काम हांवें केलां, अशेंय तांणी म्हणिल्लें. कॅनडा, चीन आनी मेक्सिकोचे कर अमेरिकेन वाडयल्यात. स्टील आनी अॅल्युमिनीयमाचेर सगल्यांकूच चड शुल्क भरचें पडटलें. ह्या टिट फाॅर टेट टॅक्सा वयल्यान मुखार बरेंच महाभारत जावपाचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
