भांगरभूंय | प्रतिनिधी
न्यूयॉर्क, खबरां संस्था: अमेरिकी कॉंग्रेसीच्या सेनेट ह्या वरीश्ठ सभाघरान रिपब्लिकन पक्षाच्या अर्थसंकल्पीय आराखड्याक मंजुरी दिली. हाका लागून अध्यक्ष डोनाल्ड ट्रम्प हांणी २०१७त हाडिल्ल्या लखांनी कोटी डॉलरांची करकपात आनी सरकार खर्चांत कपात लागू जातली. हे खातीर शुक्रारा रातच्यान सुरू आशिल्ली चर्चा शेनवारा सकाळ मेरेन चल्ली. उपरांत ५१ आड ४८ मतांनी ताका मंजुरी मेळ्ळी. नवीन तरतुदींक लागून भलायकेवेल्या खर्चांत कपात करतले, असो भंय डेमोक्रॅटिक पक्षान उक्तायली.
सेनेटांत जाल्ल्या कामकाजा मजगतीं अमेरिकेच्या एका म्हत्वाच्या नेमांत बदल केलो. ह्या नेमा प्रमाण चडश्या म्हत्वाच्या विधेयकांचे मंजुरी खातीर सेनेटच्या उण्यांत उणी ६० वांगड्यांची मंजुरी गरजेची. मात, नवे तरतुदी प्रमाण ह्या नेमाक बगल दिली. हाका लागून ट्रम्प हांच्या करकपात, सीमा सुरक्षा आनी लष्करी प्राधान्या संबंधींची विधेयकां मंजूर जावपा खातीर डेमोक्रॅटीक पक्षाच्या मतांची गरज आतां उरची ना.
मंदीच्या अंदमासांत वाड
जे पी मॉर्गन ह्या संवसारीक वित्तीय सेवा कंपनीन संवसारीक मंदीच्या अंदाजांत वाड केल्या. ह्यान पयलीं जे पी मॉर्गनान संवसारीक मंदीची शक्यताय ४० टक्के आशिल्ल्याचो अदमास उक्तायिल्लो. तातूंत दुरुस्ती करून आतां ही शक्यताय ६० टक्के आशिल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
